L'emprim parlament da mattas dal Grischun, che ha salvà sia sessiun ils 8 da november 2012 a Cuira, ha concludì en las votaziuns finalas d'inoltrar duas propostas sco petiziuns al cussegl grond. Las petiziuns èn en il fratemp vegnidas examinadas dal secretariat dal cussegl grond e transmessas a la conferenza da las presidentas e dals presidents dal cussegl grond. La conferenza da las presidentas e dals presidents decida davart l'ulteriur proceder.

Il parlament da mattas e las petiziunarias Marisa Tscholl (Val Müstair) e Jolene Jäger (Cuira) giavischan ch'il pretsch da l'abunament general grischun (BüGA) vegnia reducì per la mesadad per giuvenils, fin che quels han terminà lur emprima scolaziun. Cun questa mesira duain per l'ina ils giuvenils da las regiuns periferas pudair utilisar favuraivlamain il traffic public. Per l'autra vegni renvià en la motivaziun quant impurtant ch'i saja da famigliarisar ils giuvenils baud cun il traffic public ecologic. La segunda petiziun s'occupa da cybermobbing. Perquai ch'ellas han fatg experientschas persunalas ed èn pertutgadas proponan las petiziunarias Adriana Deplazes (Sedrun) e Flurina Risch (Cuira) che las vischnancas da scola vegnian obligadas d'endrizzar en l'avegnir ina purschida da cussegliaziun gratuita per las victimas da cybermobbing. 


Infurmaziuns:
Silvia Hofmann, post da stab per l'egualitad da las schanzas, tel. 081 257 35 71, e-mail: Silvia.Hofmann@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas