Per il chantun Grischun vegn fatga per l'emprima giada in'analisa dals privels cumplessiva. La regenza grischuna ha surdà ina incarica per quai. Ultra da quai ha ella deliberà in project per engrondir la via da Samignun ed ha relaschà la glista da las chasas da tgira 2013. 

Surdà incumbensa d'analisar ils privels
Per incumbensa da la regenza elavura l'uffizi da militar e da protecziun civila fin il mars 2014 in'analisa dals privels cumplessiva per il chantun Grischun. Tar questa analisa vegnan resguardadas periclitaziuns che stuessan vegnir numnadas eveniments en situaziuns spezialas, sch'ellas capitassan, e per dumagnar talas fissi necessari da duvrar il sistem da coordinaziun da la protecziun da la populaziun. Retschertgas gia fatgas – sco per exempel davart ils privels da la natira en il chantun – vegnan integradas en las lavurs. La finamira è da far – sin basa dal manual federal KATAPLAN – ina priorisaziun da las periclitaziuns che vegnan resguardadas sco pussaivlas. Suenter l'analisa vegnan planisadas mesiras per reducir las ristgas. Per accumpagnar questas lavurs è vegnida installada ina cumissiun directiva sut il presidi dal cusseglier guvernativ Christian Rathgeb. 

Relaschà la glista da las chasas da tgira 2013
La regenza ha relaschà la glista da las chasas da tgira dal chantun Grischun per l'onn 2013. Las chasas da persunas attempadas e da tgira sco er las gruppas da tgira che figureschan sin quella glista èn autorisadas d'exequir lur activitad a quint da l'assicuranza obligatorica per la tgira da persunas malsaunas. Il medem mument han questas instituziuns il dretg da survegnir contribuziuns da prestaziun dal chantun e da las vischnancas. Tut las midadas da la purschida da letgs ch'èn vegnidas fatgas durant l'onn passà èn resguardadas sin la glista. Tut en tut dispona il chantun Grischun actualmain da 2401 letgs en il sectur da persunas attempadas e da tgira (glista da las chasas da tgira 2012: 2352 letgs). Da nov figureschan sin la glista las clinicas psichiatricas Waldhaus, Cuira, e Beverin, Cazas, cun 10 letgs.
(Link tar la glista da las chasas da tgira 2013) 

Novs ciclus da scolaziun en pedagogia curativa da scola
Il chantun Grischun dovra ulteriuras spezialistas e spezialists cun ina furmaziun en pedagogia curativa da scola. La regenza ha approvà novs ciclus da scolaziun en pedagogia curativa da scola a la scola auta da pedagogia dal Grischun (SAPGR) a Cuira che vegnan realisads en collavuraziun cun la scola auta interchantunala da pedagogia curativa Turitg. Ils curs da furmaziun supplementara da 3 onns che vegnan fatgs en moda cumplementara a la professiun cumenzan l'atun 2014, l'atun 2016 ed opziunalmain l'atun 2018. Ils custs totals per ils trais ciclus da scolaziun importan circa 2,7 milliuns francs.
Ils onns 2008, 2009, 2010 e 2011 èn gia vegnids cumenzads a la SAPGR quatter curs da furmaziun supplementara en pedagogia curativa da scola ch'èn vegnids terminads per gronda part. Cur che l'ultim curs va a fin quest onn, dispona il chantun da var 100 ulteriuras spezialistas e spezialists cun ina scolaziun en pedagogia curativa da scola. Il basegn permanent da talas spezialistas e spezialists è d'attribuir al fatg ch'il chantun ha introducì dapi ils onns 1990 classas pitschnas integradas en tut las regiuns e ch'i vegnan duvradas adina dapli resursas per integrar uffants cun impediments. 

Refusà la pretensiun per dapli meds d'instrucziun en ils idioms
En la sessiun da zercladur 2012 ha il cussegl grond deliberà in credit d'impegn per translatar ils meds d'instrucziun da matematica obligatorics per il stgalim primar en tut ils idioms rumantschs. Dumondas da las suprastanzas communalas da Ruschein, da Sumvitg e da Trun d'edir er ils novs meds d'instrucziun da lingua, ch'èn vegnids edids en rumantsch grischun, en ils idioms ha la regenza refusà. Tenor la nova lescha da scola po il chantun edir meds d'instrucziun e pajar contribuziuns per als render pli bunmartgads. In'obligaziun giuridica per la regenza, d'edir tscherts meds d'instrucziun en tschertas linguas, n'exista dentant betg. Avant ch'il plan d'instrucziun 21 è avant maun ed avant il conclus definitiv d'introducir quest plan d'instrucziun ch'è vegnì elavurà sin plaun interchantunal na vegn il chantun betg a declerar in med d'instrucziun nov sco obligatoric u sviluppar sez meds d'instrucziun. 

Mess en vigur la lescha davart ils servetschs psichiatrics dal Grischun
La regenza ha concludì da metter retroactivamain en vigur la lescha davart ils servetschs psichiatrics dal Grischun ch'è vegnida concludida dal cussegl grond ils 23 d'october 2012 per il 1. da schaner 2013. 
 

Da vischnancas e da regiuns

• Flem: Il project per construir rempars per il Begl Valletta en la vischnanca da Flem vegn approvà cun midadas. Als custs vegn concedida ina contribuziun chantunala da tut en tut maximalmain 222 250 francs. Cun il project vegn reducida sin ina dimensiun acceptabla la periclitaziun d'aua gronda che l'aual munta per il vitg. Tranter auter vegn construì in batschigl cun in volumen da circa 2200 meters cubic che duai retegnair la gera e che serva a medem temp sco implant da stgargiada d'aua gronda.
• Trimmis: A la vischnanca da Trimmis vegn concedida ina contribuziun da 34 800 francs per renovar mirs sitgs.
• Samignun: Il plan da las zonas da protecziun per la tschiffada d'aua sutterrana Motnaida ed il reglament per las zonas da protecziun per l'aua sutterrana e per las funtaunas da la vischnanca da Samignun dals 11 fanadur 2012 vegnan approvads.
• Flearda, Urmagn e Tschappina: Ils statuts da la corporaziun da vischnancas "Products da la Mantogna" vegnan approvads. 
   

Projects da vias
La via da Samignun survegn in nov tunnel "Val Pischöt"
La regenza grischuna ha approvà il project d'exposiziun per curreger la via da Samignun, traject dal tunnel "Val Pischöt". La part centrala dal traject da la via da Samignun che duai vegnir engrondì e che ha ina lunghezza da circa 560 meters è il nov tunnel "Val Pischöt" cun ina lunghezza da 290 meters. El remplazza la galaria existenta. Grazia a quest project po la segirezza dal traffic e dal manaschi vegnir augmentada per quest traject e plinavant poi vegnir cuntanschì ch'il traffic circulescha qua cuntinuadamain. Meglieraziuns datti ultra da quai per il mantegniment da la via e per il servetsch d'enviern. Ils custs totals dal project importan 16 milliuns francs.
La substanza architectonica da la via da Samignun deriva per gronda part anc dal cumenzament dal 20. tschientaner ed è dapi lura vegnida renovada e restaurada per gronda part mo punctualmain. En il sectur da la galaria existenta "Val Pischöt" na correspunda la via betg pli a las pretensiuns actualas en quai che reguarda la ladezza e la geometria. Ultra da quai è la via exposta a numerus privels da la natira sco lavinas e crudada da crappa. L'enviern sto ella mintgamai vegnir serrada per plirs dis pervia da lavinas

Ultra da quai ha la regenza approvà 1 milliun francs per lavurs da construcziun sin ils suandants trajects:
- via dal Partenz: lavurs d'impressari, sutpassadi da viafier "Wolfgang" 
 
 
Gremi: regenza
Funtauna: rg chanzlia chantunala dal Grischun