Il center da furmaziun e cussegliaziun agricula Plantahof a Landquart survegn ina nova stalla da muvel grond. Suenter ch'il cussegl grond ha approvà en la sessiun d'october 2010 in credit d'impegn da 7 milliuns francs e suenter che las lavurs da planisaziun èn terminadas, pon ins cumenzar a construir. Oz ha gì lieu l'emprima badigliada en in rom uffizial.

Durant sia istorgia da passa 100 onns en l'allevament da muvel e sco manaschi da scolaziun e da furmaziun supplementara è il center da furmaziun e cussegliaziun agricula Plantahof sa sviluppà ad in center da cumpetenza per allevament da muvel e per economia d'alp en il territori alpin germanofon. Ses renum remartgabel en tut la Svizra sa basa sin il fatg ch'el è – sco scola agricula – in manaschi agricul da model per la scolaziun e per l'allevament d'animals (razza brina) sco er per la furmaziun supplementara e per cussegliaziuns.
En la nova stalla da muvel grond dal Plantahof vegnan ils uigls actuals – che dateschan da l'onn 1964 e nua ch'ils animals vegnan rentads – remplazzads tras uigls libers moderns che correspundan a la natira dals animals. Cun las emprovas da separar las muntaneras, fatgas dapi l'onn 2003, vegni cuntinuà sut novas e meglras cundiziuns generalas. Tar tut las categorias d'animals stat lur bainstar en il center. En la stalla nova correspundan la glisch, l'aria, ils letgs ed il provediment d'aua als criteris che valan ozendi per ina tratga d'animals exemplarica.
Integrads en la stalla èn dus gronds locals da scolaziun per l'instrucziun pratica. En tut ils secturs èsi pussaivel da far exercizis cun gruppas pitschnas. Er per visitadras e visitaders che n'èn betg da chasa en l'agricultura daventa l'invista da la mulschera generusa in'aventura.

Implant solar sin il tetg
La stalla da muvel grond è concepida sco construcziun en lain. Singulas parts vegnan dentant construidas en moda massiva. Sin las surfatschas dal tetg ch'èn drizzadas vers sid è planisà in implant solar da 1700 meters quadrat. L'energia producida là correspunda circa al consum d'electricitad da 60 chasadas da standard.
Ils novs edifizis ed ils indrizs moderns permettan al center da furmaziun e cussegliaziun agricula Plantahof da realisar l'instrucziun orientada a l'acziun confurm al temp sco er da perfecziunar quella er vinavant. La nova stalla è finida e po vegnir retratga per la fin da l'onn 2013.


Infurmaziuns:
- Markus Dünner, architect chantunal, uffizi da construcziun auta, tel. 081 257 36 31
- Peter Küchler, directur dal Plantahof, tel. 081 257 60 01 


Gremi: uffizi da construcziun auta dal Grischun
Funtauna: rg uffizi da construcziun auta dal Grischun