La regenza grischuna deplorescha la fin dal project "Olimpia 2022". Ussa vali da preparar il chantun per l'avegnir senza il schlantsch d'ina candidatura per ils gieus olimpics. La regenza spera ch'il chantun muntagnard possia profitar per ses ulteriur svilup da la viva discussiun ch'è vegnida iniziada las ultimas emnas. Tut las forzas en il chantun èn supplitgadas da collavurar.

A San Murezzan ed a Tavau è la maioritad da la populaziun s'exprimida a favur d'ina candidatura per ils gieus olimpics d'enviern 2022. Il resultat chantunal total è percunter stà negativ, quai che la regenza deplorescha. Grazia al project "Olimpia 2022" èsi tuttina gartegià da lantschar ina discussiun davart il futur dal chantun muntagnard. Da questa dinamica stuess il Grischun profitar per dumagnar cuminaivlamain las sfidas pretensiusas, cun las qualas el e l'economia grischuna sa vesan confruntads. 

Tge signifitgescha il na a l'olimpia?
L'infrastructura da la viafier e da la via
Ils projects da traffic dal Grischun èn anc adina en ina situaziun da concurrenza cun ils projects da las grondas aglomeraziuns. L'impurtanza per l'economia publica dals projects grischuns è – cumpareglià cun il rest da la Svizra – relativamain pitschna. Perquai èn las schanzas ch'ils projects planisads vegnian realisads anc intschertas. Tuttina vegn la regenza a sa stentar cun tutta forza da defender efficaziamain ils interess da la politica da traffic dal Grischun. 

Sport ed ambient
Stabiliments da sport pon vegnir promovids en il rom dal concept per implants da sport d'impurtanza naziunala resp. chantunala (CISIN/CISIC) che metta a disposiziun ils meds finanzials. Actual per il Grischun è per il mument il project davart in center da prestaziun per unihockey a Cuira. Il chantun vegn a s'engaschar vinavant ch'i vegnia realisà en il Grischun in center naziunal per il sport d'enviern.

L'incumbensa dal cussegl grond concernent emnas da sport d'enviern en scolinas vegn realisada sco planisà cun manar tras in project da pilot cun scolinas da las differentas regiuns linguisticas. 

Finanzas
Il credit d'impegn dad 8 milliuns francs ch'il cussegl grond ha deliberà scroda. El è vegnì concedì unicamain per finanziar la part chantunala da la candidatura per ils gieus olimpics d'enviern 2022 en il Grischun.

Las reservas en l'autezza da 300 milliuns francs na vegnan betg furmadas. L'agen chapital da circa 1 milliarda francs resta pia disponibel. La regenza persista che l'agen chapital na duaja betg vegnir duvrà per finanziar custs currents, mabain oravant tut per realisar infrastructuras necessarias. 

Economia publica
Sin basa d'ina incumbensa ch'è vegnida acceptada la sessiun d'october 2012 dal cussegl grond dal Grischun vegn la regenza ad elavurar ina strategia concernent il svilup dals territoris da muntogna. La strategia vegn a sa basar sin il svilup tar la confederaziun che vegn ad examinar quest svilup en il rom da la missiva concernent la promoziun dal lieu 2016-2019 er en reguard a las sfidas che resultan da l'iniziativa cunter las abitaziuns secundaras e che ha survegnì – cun quai che la moziun Maissen è vegnida acceptada – l'incumbensa da sviluppar ina strategia coerenta per il territori da muntogna. 
 
La refurma dal turissem grischun cun la finamira principala da crear destinaziuns vegn ad esser terminada per gronda part per la fin da l'onn. La basa per in program successur, il program da turissem 2014-2021, vegn elavurada actualmain cun represchentants da las destinaziuns. La direcziun principala è quella d'augmentar vinavant la cumpetitivitad internaziunala e da meglierar la valurisaziun dals purtaders da prestaziuns.

Betg mo per la branscha turistica, mabain per il Grischun sco lieu economic en general ston las cundiziuns generalas vegnir meglieradas cuntinuadamain. Ultra da quai pon vegnir sustegnids projects singuls che han in effect tant per tschertas regiuns sco er per tut il chantun. Per exempel cun realisar in center da prestaziun per unihockey a Cuira; il campiunadi mundial da skis 2017; l'elavuraziun dals martgads da la Brasilia, da l'India e da la China u il project "Tschima - Kulturelle Intervention am Berg" da la gruppa Arena alva. 

Uniun "XXIV. Gieus olimpics d'enviern Grischun 2022"
L'uniun vegn a terminar las lavurs currentas ed a far il rendaquint final. Tenor la cunvegna tranter ils partenaris participads surpiglia la confederaziun, swiss olympic ed il chantun ensemen cun las vischnancas da San Murezzan e da Tavau mintgamai in terz da las expensas budgetadas da 5,4 milliuns francs. La contribuziun chantunala garantida da la regenza importa 900 000 francs. Anc averta è la dumonda en tge furma che las enconuschientschas ch'èn resultadas dals studis da realisabladad pon vegnir sfruttadas. 
 
 
Iniziativa chantunala dal pievel "Per elecziuns gistas" (iniziativa da proporz 2014)
Il cussegl grond vegn elegì vinavant tenor la procedura da maiorz
Cun refusar l'iniziativa da proporz 2014 èn las votantas ed ils votants dal Grischun s'exprimids in'ulteriura giada cunter ina midada dal sistem electoral per il cussegl grond, e quai da la procedura da maiorz a la procedura da proporz. I vala da respectar questa decisiun dal suveran. Il cussegl grond vegn pia elegì vinavant tenor ina procedura da maiorz ch'è vegnida approvada senza resalvas da l'assamblea federala. Las proximas elecziuns da renovaziun dal cussegl grond han lieu il matg 2014. 
 
 
Midada da la lescha federala davart la planisaziun dal territori
Enconuschentamain ha il chantun Grischun fatg per gronda part sias lezias concernent la planisaziun dal territori. Perquai èn las consequenzas directas che resultan da l'acceptaziun da la midada da la lescha federala davart la planisaziun dal territori moderadas per il chantun Grischun. En l'ordinaziun duai vegnir stgaffì avunda spazi d'agir per soluziuns raschunaivlas, quai vul dir che capacitads ch'èn avant maun duain vegnir concentradas en quels territoris che han ina dinamica respectiva. En territoris rurals senza dinamica na duain percunter vegnir fatgas naginas exzonaziuns activas sistematicas. Per mancanza d'in svilup na datti en quests territoris tuttina strusch in "privel" per la cuntrada. 
 

Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01
Contacts per las medias la dumengia da votaziun:
servetsch da medias, chanzlia chantunala dal Grischun, tel. 081 257 22 47


Gremi: regenza
Funtauna: rg chanzlia chantunala dal Grischun