La regenza grischuna ha approvà ina promoziun finanziala da la colliaziun dals territoris da skis tranter Arosa e Lai. Plinavant ha la regenza prendì posiziun davart differentas fatschentas en il rom da consultaziuns sin plaun federal. 

Sustegn finanzial per la colliaziun dals territoris da skis tranter Arosa e Lai
La confederaziun ed il chantun sustegnan la colliaziun dals territoris da skis tranter las duas destinaziuns Arosa e Lai. A la Urden SA vegn concedì in emprest da la confederaziun da 4 milliuns francs en il rom da la nova politica regiunala (NPR) per il project "Colliaziun dals territoris da skis Urden". Quai cun la resalva che la finanziaziun totala saja reglada. L'emprest sto vegnir restituì entaifer 15 onns. Sco prestaziun d'equivalenza a l'emprest da la NPR vegn garantida ina contribuziun chantunala da 928 690 francs.
Tras la construcziun da la teleferica da colliaziun Hörnli-Urdenfürggli daventan ils territoris da Lai e d'Arosa ina regiun da sport da naiv coerenta che tutga tar las pli grondas dal Grischun. Il project "Colliaziun dals territoris da skis Urden" è in project d'infrastructura extraordinari per il chantun turistic. El po dar impuls da svilup impurtants er en ils dus lieus Arosa e Lai. Tras la colliaziun directa tranter ils dus territoris da sport da naiv quintan ins cun ina meglieraziun substanziala da la creaziun da valurs en las duas regiuns. 

Beneventà la midada da la lescha davart las publicaziuns uffizialas
La regenza grischuna beneventa la midada proponida da la lescha federala davart las publicaziuns uffizialas. La finamira primara da la revisiun da la lescha è la midada da la forza giuridica lianta da la publicaziun stampada a la publicaziun electronica da texts en la collecziun uffiziala ed en il fegl uffizial federal. Tenor l'avis da la regenza s'impona questa midada dal primat, perquai ch'il primat vertent da la publicaziun stampada na reflectescha betg pli las disas actualas da la gronda part da las utilisadras e dals utilisaders e perquai ch'el na correspunda pia er betg pli a lur aspectativas. La regenza beneventa er ils plans da crear ina plattafurma electronica e cumplessiva da publicaziun che duai dar a tut las requirentas ed a tut ils requirents da dretg in access electronic liber e segir al dretg federal. En quest connex èsi in grond giavisch da la regenza ch'ils texts da la collecziun sistematica dal dretg federal, che vegnan purschids en rumantsch, stettian medemamain a disposiziun sin la plattafurma da publicaziun. 

La promoziun e la protecziun d'uffants e da giuvenils è reglada suffizientamain
La cumissiun per scienza, educaziun e cultura dal cussegl naziunal vuless rinforzar las mesiras da la confederaziun en la politica d'uffants e da giuvenils. Tras ina cumplettaziun da la constituziun duai la confederaziun survegnir la cumpetenza da fixar princips davart la promoziun e la protecziun d'uffants e da giuvenils sco er davart lur cooperaziun a la politica ed a la societad. Las cumpetenzas essenzialas en il sectur da la promoziun sco er da la protecziun d'uffants e da giuvenils tutgan oz als chantuns ed a las vischnancas. Correspundentamain finanzieschan els er las mesiras che vegnan prendidas en quest sectur. Er ord vista da la regenza grischuna èsi impurtant da tadlar sco er da laschar cooperar e cundecider la generaziun giuvna e da percepir lur basegns. L'urden giuridic svizzer cuntegna dentant gia oz ina vasta paletta da disposiziuns da protecziun e da promoziun per uffants e per giuvenils. Da cumplettar la constituziun, sco quai che la cumissiun dal cussegl naziunal propona, n'è perquai betg necessari ord vista da la regenza. 

La regenza sustegna in rinforzament da la medischina da chasa
La regenza grischuna prenda posiziun tar la revisiun parziala da l'ordinaziun federala davart l'assicuranza da malsauns. La regenza sustegna l'emprim punct da questa revisiun parziala, numnadamain l'adattaziun da las cundiziuns d'admissiun per il labor pratic. Uschia po la media responsabla u il medi responsabel far en l'avegnir tschertas analisas ordaifer las localitads da l'atgna pratica, cur ch'ella u el visita la pazienta u il pazient a chasa u en la chasa da persunas attempadas u da tgira, e quintar giu questas analisas sin donn e cust da l'assicuranza obligatorica per la tgira da persunas malsaunas. Questas analisas, che vegnan fatgas cun agid da strivlas da test u da pitschens apparats purtabels, portan resultats entaifer paucas minutas, quai che facilitescha ed accelerescha la procedura da diagnosa e da terapia. Tenor l'avis da la regenza rinforza questa midada la medischina da chasa, ed ella correspunda ad in cler basegn.
Il segund punct da la revisiun parziala pertutga l'admissiun da neuropsicologas e da neuropsicologs sco furnituras e furniturs da prestaziuns da la lescha federala davart l'assicuranza da malsauns. Cunquai ch'ina proposta concreta per circumscriver las prestaziuns da las neuropsicologas e dals neuropsicologs n'è betg anc avant maun, propona la regenza da sistir la dumonda da l'admissiun fin lura. 
 

Da vischnancas e da regiuns 

• Tavau: La confederaziun ed il chantun sustegnan il project "Management regiunal 2013–2015" da la vischnanca da Tavau en cooperaziun cun la vischnanca da Claustra-Serneus. Quest program ha l'intent da promover il svilup economic da la regiun economica Tavau-Partenz e persequitescha las finamiras d'augmentar la cumpetitivitad da questa regiun, da segirar las plazzas da lavur existentas e da stgaffir novas plazzas, da generar ina valur agiuntada supplementara e da prestar ina contribuziun a la creschientscha economica dal chantun Grischun. En il rom da la nova politica regiunala (NPR) vegn garantida al project per la perioda 2013-2015 ina contribuziun totala da maximalmain 453 750 francs (confederaziun e chantun), sin il pli dentant 165 000 francs per onn. Resalvada resta la concessiun dals credits necessaris tras il cussegl grond. 

 
Projects da vias
La regenza ha approvà var 6,1 milliuns francs per lavurs da construcziun sin ils suandants trajects:
- via d'Engiadina: lavurs d'impressari, sviament da Scuol
- via sursilvana: lavurs d'impressari, reparaziun, Schluein – Rueun
- via taliana: lavurs d'impressari e da cuvrida en connex cun la reparaziun da la punt dal Aclatobel 
 

Gremi: regenza
Funtauna: rg chanzlia chantunala dal Grischun