La cumissiun predeliberanta dal cussegl grond ha terminà l'examinaziun da las pussaivladads per augmentar l'effizienza en il cussegl grond e preschenta sias enconuschientschas en in rapport al cussegl grond. Proponì vegn oravant tut in reschim pli sever en connex cun la durada dal votum en il parlament. 
 
La cumissiun predeliberanta ch'è vegnida installada ad hoc dal cussegl grond per examinar pussaivladads per augmentar l'effizienza en il manaschi dal cussegl grond ha terminà sia lavur e fixà sias enconuschientschas en in rapport separà. Per las midadas essenzialas sto l'urden da gestiun dal cussegl grond vegnir adattà.
La cumissiun propona al cussegl grond da limitar oravant tut la durada dal votum da las commembras e dals commembers dal cussegl grond. Quella importa da nov 6 minutas (fin ussa 10 minutas) tar l'emprim votum e maximalmain 4 minutas (fin ussa er 10 minutas) tar il segund votum per mintga punct da discussiun. Ad ina limitaziun da la durada dal votum duain – a l'avis da la cumissiun – vegnir suttamess da nov er las commembras ed ils commembers da la regenza. Sco a las pledadras ed als pledaders da las cumissiuns duain star a disposiziun a las represchentantas ed als represchentants da la regenza en il futur per regla maximalmain 10 minutas per mintga votum.
Er las preschentaziuns annualas dals rapports da gestiun en la sessiun da zercladur duain vegnir scursanidas. Reglada da nov vegn er l'ura da dumondas. Las dumondas inoltradas vegnan da nov e cuntrari al sistem vertent repartidas al cussegl grond avant l'ura da dumondas, uschia ch'i po vegnir renunzià da preleger las dumondas. A l'avis da la cumissiun vegn quai er ad augmentar l'effizienza. L'object da la revisiun èn alura anc singuls giavischs che vegnan adattads cun questa chaschun a las relaziuns ch'èn sa midadas. En ses rapport fa la cumissiun predeliberanta ultra da quai singulas recumandaziuns concernent l'andament da la procedura, che duain gidar ad optimar las tractativas da relaschs.
Il rapport e la proposta vegnan tractads en il cussegl grond la sessiun d'avrigl 2013. 
 

Infurmaziuns:
deputà Ludwig Waidacher, president da la cumissiun predeliberanta, tel. 079 407 51 88


Gremi: cumissiun predeliberanta per augmentar l'effizienza en il cussegl grond
Funtauna: rg cumissiun predeliberanta per augmentar l'effizienza en il cussegl grond