La cumissiun dal cussegl grond per politica da stadi e strategia refusescha l'iniziativa dal pievel "Fermas vischnancas – in ferm chantun" senza cuntraproposta. 

La cumissiun dal cussegl grond per politica da stadi e strategia ha predeliberà la missiva da la regenza tar l'iniziativa dal pievel "Fermas vischnancas – in ferm chantun" sut il presidi dal deputà Bruno W. Claus ed en preschientscha da la cussegliera guvernativa Barbara Janom Steiner. La fatschenta vegn ad occupar il cussegl grond durant la sessiun d'avrigl 2013.
Suenter ina discussiun detagliada e pli profunda è la gronda maioritad da la cumissiun – en concordanza cun la regenza – arrivada a la conclusiun da recumandar al pievel da refusar l'iniziativa dal pievel "Fermas vischnancas – in ferm chantun". Ina minoritad da la cumissiun sustegna l'iniziativa. La maioritad da la cumissiun approvescha consequentamain las finamiras e las strategias da la refurma da vischnancas ch'il cussegl grond ha concludì durant la sessiun da favrer 2011 cun ina clera maioritad. Tenor il conclus dal cussegl grond da lura duain ins empruvar da cuntanscher fin l'onn 2020 tranter 50 e 100 vischnancas ed a lunga vista sut 50 vischnancas. Plinavant duain fusiuns da vischnancas vegnir promovidas er vinavant tenor il princip da "bottom up", q.v.d. iniziadas da sut ensi e promovidas dal chantun. Tenor l'avis da la minoritad da la cumissiun han las fusiuns ch'èn vegnidas realisadas dapi lura e ch'èn gia decididas e projectadas cumprovà ch'ins po cuntanscher la finamira giavischada sin questa via inditgada. I na dat pia nagin basegn da divergiar da la decisiun da princip dal cussegl grond e da midar quella. Per quest motiv desista la cumissiun er d'ina cuntraproposta. 
  

Infurmaziuns:
Bruno W. Claus, president da la cumissiun per politica da stadi e strategia, tel. 079 333 92 92 


Gremi: cumissiun dal cussegl grond per politica da stadi e strategia
Funtauna: rg cumissiun dal cussegl grond per politica da stadi e strategia