Communicaziun da la regenza dals 14 da mars 2013
- Seiteninformationen
- Erste Mitteilung
- Neuen Beitrag einfügen
En sia ultima sesida ha la regenza grischuna empermess differentas contribuziuns, tranter auter per occurrenzas culturalas.
Da vischnancas e da regiuns
- Urmagn: La revisiun parziala da la planisaziun locala, concludida da la vischnanca dad Urmagn ils 8 d'october 2012, vegn approvada. Il cuntegn da la revisiun parziala è la determinaziun d'ina zona d'abitar per persunas indigenas ch'è vegnida creada da nov sin las parcellas nr. 3 e 4 en il territori da "Baltermeins". La vischnanca dad Urmagn ha l'intenziun da metter a disposiziun per la populaziun residenta dad Urmagn, cunzunt per famiglias cun uffants, terren da construcziun ad in pretsch raschunaivel en la vischinanza dal vitg.
Contribuziuns chantunalas a differentas instituziuns
- Club da hockey da Tavau: Al club da hockey da Tavau vegn concedì ina contribuziun dal fond da sport da maximalmain 56 840 francs per l'acquisiziun d'in nov equipament dal local da trenament da forza.
- Fundaziun per l'orchester da la Svizra taliana (FOSI): La fundaziun per l'orchester da la Svizra taliana (FOSI) survegn per ils onns 2013 fin 2016 annualmain ina contribuziun en l'import dad 80 000 francs or da las contribuziuns da la promoziun da la cultura.
- Lia rumantscha: La regenza ha approvà la cunvegna da prestaziun tranter il chantun e la Lia rumantscha per la perioda da legislatura dals onns 2013 fin 2016. La cunvegna cumpiglia tschintg gruppas da products linguistica applitgada, furmaziun, projects, cussegliaziun e producziuns. Per quests intents survegn la Lia rumantscha ina contribuziun chantunala annuala d'in import da 500 000 francs sco er ina contribuziun federala annuala da 2 150 000 francs. Per las contribuziuns chantunalas ch'èn vegnidas empermessas vala la resalva ch'il cussegl grond approveschia il credit correspundent. Il credit da la confederaziun suttastat a l'approvaziun dal preventiv annual tras las chombras federalas.
Contribuziuns ad occurrenzas culturalas
- Festival cultural Origen 2013: Al festival cultural Origen 2013 cun il gieu al liber "Noah" e cun numerusas ulteriuras occurrenzas en il chantun vegn concedida ina garanzia da deficit da maximalmain 200 000 francs.
- Opera dal chastè da Haldenstein 2013: A l'opera dal chastè da Haldenstein 2013 cun diesch represchentaziuns dal "Rigoletto" da Verdi durant il mais d'avust vegn empermessa ina garanzia da deficit da maximalmain 120 000 francs.
- Opera San Murezzan 2013: A l'opera da San Murezzan 2013 cun set represchentaziuns dal "Don Giovanni" da Mozart durant ils mais da zercladur/fanadur vegn empermessa ina garanzia da deficit da maximalmain 80 000 francs.
- Festival da jazz San Murezzan 2013: Al festival da jazz San Murezzan 2013 cun circa 30 concerts durant ils mais da fanadur/avust vegn empermessa ina garanzia da deficit da maximalmain 120 000 francs.
Gremi: regenza
Funtauna: rg chanzlia chantunala dal Grischun
Neuer Artikel