L'ultima etappa decisiva per il sviament da Küblis è cuntanschida: Il tunnel dal sviament è vegnì perfurà oz cun success. In motiv da s'allegrar er per il cusseglier guvernativ Mario Cavigelli.

Cun la perfuraziun dal tunnel da Küblis d'ina lunghezza da 2255 meters è vegnida cuntanschida in'etappa impurtanta tar la realisaziun dal sviament da Küblis. Las persunas spezialisadas participadas ed ils giasts envidads han festivà oz ensemen cun il cusseglier guvernativ cumpetent Mario Cavigelli l'eveniment en moda cunvegnenta. Ils ristgs geologics en il flisch dal Partenz e tar la sutpassada dal Schanielatobel èn surmuntads – e cun quai er la pli gronda ristga finanziala d'in surpassament dals custs pervia da pli grondas zonas da disturbis. Il grip è sa mussà buntadaivel. Nagut na dastgass pli impedir l'avertura dal sviament da Küblis l'atun 2016. Ils custs ch'èn resultads fin ussa èn en il rom dal preventiv da 210 milliuns francs.
Suenter avair terminà las lavurs d'exchavaziun suondan las construcziuns d'interiurs dal tunnel cun l'isolaziun cunter l'aua da muntogna, cun il betun dal rintg interiur, cun l'installaziun dals conducts da drenascha e dal vial effectiv sco er cun la montascha dals indrizs electromecanics. Tar ils indrizs a l'exteriur sto anc vegnir realisà l'access cumplain da Dalvazza. A partir da l'onn 2016 vegnan tut ils vitgs en il Partenz ad esser deliberads dal traffic da transit da la A28. 


Agiunta:
Fegl d'infurmaziun actual da l'uffizi da construcziun bassa davart il sviament da Küblis 

Remartga:
Davart quest tema stat a disposiziun in video sut www.gr.ch. 
 

Infurmaziuns:
- Roger Stäubli, schef da la construcziun da vias, tel. 081 257 38 42, mobil 079 220 79 43
- Peter Stirnimann, pledader per las medias da l'uffizi da construcziun bassa, tel. 081 257 37 11, mobil 079 291 72 75


Gremi: departament da construcziun, traffic e selvicultura
Funtauna: rg departament da construcziun, traffic e selvicultura