Nov interpresas pitschnas e mesaunas (IPM) grischunas lavuran vi da la favuraivladad da lur manaschi per famiglias. Quai fan ellas en il rom dal project "IPM en acziun: structuras favuraivlas per famiglias sco factur da success" dal post da stab chantunal per l'egualitad da las schanzas. Dacurt èn las IPM sa scuntradas ad in segund barat.

Per realisar structuras favuraivlas per famiglias dovri mesiras individualas ch'èn concepidas aposta per il manaschi. L'onn passà han nov IPM da la Val dal Rain da Cuira laschà far cun success in'analisa da lur cundiziuns da lavur ed han alura elavurà emprims plans da mesiras. Quai cun il sustegn professiunal dal center "UND". A chaschun da maisas radundas han las IPM pudì barattar las experientschas ch'ellas han fatg cun ils plans da mesiras. Sco avantatg valiteschan ellas en spezial er la vista suror ils cunfins da la branscha.

Ils 14 da mars 2013 èn las IPM sa scuntradas a la segunda maisa radunda. Sin proposta da las interpresas èn vegnids tractads ils temas "Politica da salaris" e "Dapli dunnas en il cader". Quai suenter ch'igl eran vegnids approfundads a l'emprima maisa radunda ils temas "Acquistar cun success forzas spezialisadas" e "Communitgar vers anora e vers anen las structuras favuraivlas per famiglias en l'interpresa". 

Interpresas da tut ils secturs
Las IPM grischunas che s'engaschan en il project dal post da stab per l'egualitad da las schanzas represchentan quasi l'entir spectrum da branschas dal chantun: IBC Energia Aua Cuira, Merz Gastro SA, Josias Gasser Materialias da construcziun SA, Do it Martgà da construcziun, spitex Cuira, Bus da la citad da Cuira SA, Lia rumantscha, hotel Stern e Wenzel Metromec SA. Tut en tut profiteschan en l'avegnir circa 700 collavuraturas e collavuraturs en questas interpresas da pudair coordinar meglier la professiun cun la famiglia e cun la vita privata. In enritgiment per quest project è il fatg ch'igl èn participadas d'ina vart interpresas, nua che quasi mo umens u mo dunnas lavuran, ma da l'autra vart er interpresas cun teams maschadads.

En la proxima fasa dal project vegnan ils resultats analisads ed evaluads ensemen cun las interpresas. La finamira dal program è quella da laschar profitar las IPM localas da las experientschas d'autras firmas e d'autras regiuns e da crear ina conscienza per ils aspects economics positivs da cundiziuns da lavur favuraivlas per las famiglias. Il project vegn accumpagnà d'in cussegl consultativ cun represchentantas e represchentants da federaziuns economicas, dad IPM sco er da persunas da la politica e da l'economia. El vegn finanzià dal chantun Grischun, da la confederaziun e da sponsurs grischuns.

Dapli infurmaziuns sut www.stagl.gr.ch, www.und-online.ch e www.berufundfamilie.admin.ch.  
 

Infurmaziuns:
Susanna Mazzetta, manadra dal project, post da stab per l'egualitad da las schanzas, telefon mobil 079 483 74 01, e-mail: Susanna.Mazzetta@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas