L'indicatur chantunal da cumpetitivitad mussa la cumpetitivitad relativa da l'economia dals 26 chantuns svizzers. Il Grischun sa chatta tenor il studi da la UBS ch'è vegnì publitgà ultimamain sin ina da las ultimas plazzas. La regenza grischuna guarda quest resultat differenziadamain. Ils spazis economics ils pli impurtants dal Grischun èn en mintga cas cumpetitivs.

Tenor il Global Competitiveness Report 2012-2013 dal World Economic Forum (WEF) è l'economia publica da la Svizra la pli cumpetitiva da passa 100 pajais da quest mund. Entaifer la Svizra ha la UBS examinà la cumpetitivitad relativa dals chantuns tranter dad els a maun da diesch criteris dals secturs stadi, populaziun, lieu da staziunament, interpresas e structura economica. A maun da quest indicatur da cumpetitivitad sa chatta il Grischun en il classament general sin plazza 23 da 26, avant ils chantuns Vallais, Uri e Giura.

Sch'ins resguarda l'effizienza finanziala che cumpiglia ina furniziun efficazia da prestaziuns dal stadi e conturns attractivs per interpresas po il Grischun sa posiziunar sin plazza 3. Er rang 3 survegn il Grischun per la libertad d'agir pertutgant las finanzas. Ina plazza da mez occupa il Grischun en quai che reguarda ils conturns dals custs. L'ultima plazza occupa il Grischun tar ils criteris da la cuntanschibladad e da l'intschess ed ina da las ultimas plazzas tar l'innovaziun, tar la dinamica e tar la diversificaziun.

Il studi n'ha betg resguardà premissas individualas che restrenschan il potenzial da creschientscha sco per exempel relaziuns geograficas u circumstanzas istoricas. Quellas ston vegnir resguardadas tar l'interpretaziun dal studi. Il Grischun cumpiglia geograficamain circa in sisavel da la Svizra. Sch'ins na metta betg tut il chantun, mabain mo ils spazis economics impurtants dal Grischun sco la Val dal Rain grischuna e la part davant dal Partenz en relaziun cun ils auters chantuns fa il Grischun ina meglra figura gist areguard la cuntanschibladad e l'intschess, mabain er areguard la dinamica e la diversificaziun. In aspect positiv è er il fatg ch'i dat en il Grischun ina gronda prontezza da scolaziun en la furmaziun fundamentala professiunala duala. Mo var 2 % dals giuvenils che han terminà la scola n'han a la fin da lur temp da scola obligatoric nagina soluziun da cuntinuaziun. Ultra da quai po il Grischun preschentar ina quota da maturitad professiunala che sa chatta sur la media (quota MP CH 2011: 13,2 %, quota MP GR: 16,1 %). Ultra d'auters facturs resulta da questa investiziun da furmaziun en il chapital uman ina quota bassa da dischoccupaziun (tar ils giuvenils).

En quel reguard sto il resultat dal studi vegnir relativà or da l'optica da la regenza. Ma el mussa tuttina cleramain ch'il Grischun sto sa stentar vinavant per pudair star a pèr en la concurrenza cun ils auters chantuns. 
 

Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01 
 

Gremi: regenza
Funtauna: rg chanzlia chantunala dal Grischun