Per la realisaziun da la refurma dal territori ha la regenza grischuna tramess en consultaziun in'ulteriura revisiun d'ina lescha. Plinavant ha ella concretisà en in'ordinaziun la purschida d'ulteriuras structuras dal di en scola. 

La lescha davart las lottarias vegn adattada en il rom da la refurma dal territori
La refurma dal territori en il chantun Grischun, che stgaffescha las regiuns sco nov plaun statal d'amez, ha consequenzas per differents relaschs vertents. Tras quai ch'ils circuls vegnan abolids sco purtaders d'incumbensas publicas, sto er vegnir reglada da nov la cumpetenza per permetter lottarias da divertiment. Per manar tras lottarias da divertiment dovri ina permissiun che vegn actualmain concedida da l'uffizi cirquital cumpetent. Per onn vegnan permessas en il chantun en media var 200 occurrenzas da lotto e da tombola – bunamain la mesadad da quellas en il circul da Cuira.
En la consultaziun tar ina revisiun parziala da la lescha davart las lottarias propona la regenza che las permissiuns per lottarias da divertiment vegnian concedidas en l'avegnir da la regiun ch'è cumpetenta per il territori. Uschia vegni cuntinuà cun la regulaziun surcommunala vertenta. Tgi ch'è cumpetent entaifer la regiun, defineschan las regiuns sezzas. En cas da tratgas publicas è previsa sco fin ussa la cooperaziun d'ina persuna d'uffizi. Quai po esser ina persuna designada da la regiun, ina notara u in notar ubain ina notara uffiziala u in notar uffizial.
La consultaziun tar la revisiun parziala da la lescha davart las lottarias dura fin ils 21 da zercladur 2013. Ils documents pon vegnir consultads en l'internet sut www.gr.ch / Consultaziuns currentas. Gia il schaner 2013 è ina revisiun parziala da la lescha davart il notariat vegnida tramessa en consultaziun en connex cun la refurma dal territori. 

L'ordinaziun davart ulteriuras structuras dal di regla las cumpetenzas e l'andament
La regenza ha relaschà in'ordinaziun davart ulteriuras structuras dal di (ordinaziun davart structuras dal di). Questa ordinaziun regla la purschida e la finanziaziun da las structuras dal di che vegnan purschidas – en cas da basegn – da las instituziuns responsablas per la scola a partir da l'avust 2013 tenor la nova lescha da scola. I vegn creada ina clera cunfinaziun cun la tgira d'uffants cumplementara a la famiglia tras purschiders privats.
Las instituziuns responsablas per la scola èn cumpetentas per manar e per finanziar las ulteriuras structuras dal di. Per ademplir lur incumbensa pon las instituziuns responsablas per la scola engaschar organisaziuns privatas. 

11,6 milliuns francs per il mantegniment d'averturas dal guaud
Per reparar vias d'avertura impunda il chantun quest onn var 11,6 milliuns francs. La regenza ha approvà in project collectiv che l'uffizi da guaud e privels da la natira ha elavurà per incumbensa da differentas vischnancas. Cun il project vegnan fatgas en moda decentrala en tut las regiuns dal chantun investiziuns urgentas per mantegnair las averturas necessarias dal guaud. Tut en tut vegnan reparadas vias da guaud e vias da maschinas d'ina lunghezza dad 87 kilometers. Uschia vegn meglierada l'avertura da circa 15 865 hectaras guaud. L'onn 2012 aveva il chantun impundì 10,6 milliuns francs per la renovaziun da vias da guaud. 

Nagins projects da votaziun chantunals ils 9 da zercladur 2013
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 9 da zercladur 2013:
- iniziativa dal pievel dals 7 da fanadur 2011 "Elecziun dal cussegl federal tras il pievel"
- midada dals 28 da settember 2012 da la lescha d'asil
Sin plaun chantunal na datti naginas votaziuns ils 9 da zercladur 2013. 

Cunter in register da commerzi naziunal
La regenza grischuna refusa l'installaziun d'in register da commerzi naziunal. Sco ch'ella scriva en la consultaziun tar ina revisiun correspundenta dal dretg d'obligaziuns, è ella da l'avis ch'ina infrastructura naziunala centrala per il register da commerzi saja nunnecessaria e nunrealistica. Percunter resultassan per ils chantuns dischavantatgs sco custs supplementars ed ina perdita da l'autonomia. 

Refusà la lescha federala davart la registraziun da las malsognas da cancer
La lescha federala davart la registraziun da las malsognas da cancer, ch'è vegnida elavurada da la confederaziun, sto vegnir repassada tenor l'avis da la regenza. Empè d'endrizzar in post d'annunzia tar la confederaziun, sa basa il sboz da questa lescha federala sin las structuras chantunalas existentas ch'èn concepidas differentamain. La finamira da la lescha fiss en sasez quella da reglar la registraziun da tut las malsognas da cancer en ina furma unitara en tut la Svizra. Ma en la moda e maniera proponida na vegnan concedids als chantuns – tenor l'avis da la regenza – insumma nagins dretg da cundecisiun. Plinavant ha il sboz da la lescha mancanzas considerablas areguard la segirezza giavischada sco er areguard la transparenza da l'elavuraziun da las datas da las persunas pertutgadas. 
 

Da vischnancas e da regiuns

• Arosa: Ad in project da la vischnanca d'Arosa e da las Telefericas Arosa SA che vul meglierar la situaziun da midar d'in med da transport a l'auter a la staziun d'Arosa vegn garantida ina contribuziun maximala da 650 100 francs. Il project fa part d'in concept general che ha la finamira da renovar ils stabiliments da viafier tras la Viafier retica sco er da meglierar la situaziun da midar dal tren al bus local ed a las telefericas Arosa.
• Savognin: La revisiun parziala da la planisaziun locala, concludida da la vischnanca da Savognin ils 26 da november 2012, vegn approvada. Tras questa revisiun parziala vegnan stgaffidas las premissas da la planisaziun d'utilisaziun per realisar in hotel da 4 stailas.

 
Contribuziuns chantunalas a differentas instituziuns

• Fundaziun per sport da prestaziun a Tavau: A la fundaziun per sport da prestaziun a Tavau vegn garantida – per ina durada da 4 onns – ina contribuziun totala da maximalmain 90 000 francs or da la finanziaziun speziala "sport" per installar in center naziunal da trenament per snowboard.
• Associaziun grischuna da sport: A l'associaziun grischuna da sport vegn concedida ina contribuziun da maximalmain 37 000 francs or da la finanziaziun speziala "sport " per l'activitad generala da suprastanza, per realisar il parlament da sport, per manar in post d'infurmaziun giuridica, per surdar il premi grischun da sport sco er per conceder ils premis da sport da l'associaziun 2013.

Projects da vias
La regenza ha approvà 2 577 000 francs per lavurs da construcziun sin ils suandants trajects:
- via sursilvana: lavurs da cuvrida, reparaziun, Schluein – Rueun
- via d'Engiadina: lavurs d'impressari Plattamala, renovaziun dal mir da sustegn
- via da Zalön: lavurs da cuvrida Stussavgia Plaz – Zalön 
 

Gremi: regenza
Funtauna: rg chanzlia chantunala dal Grischun