Il termin absolut da 10 onns ch'è oz vertent en il dretg fiscal chantunal per la surannaziun da la taxaziun è memia curt. Per impedir perditas da taglia duai il termin vegnir auzà sin 15 onns, sco en ils auters chantuns. La regenza suttametta al cussegl grond la missiva tar ina revisiun parziala correspundenta da la lescha da taglia.

La surannaziun en il dretg fiscal procura per segirezza giuridica: Suenter la scadenza d'in tschert termin na duain las pajataglias ed ils pajataglias betg pli stuair quintar ch'il stadi pretendia debits fiscals dad ellas e dad els. Suenter in tschert temp èsi difficil da cumprovar basas fiscalas. Tut ils chantuns han ina surannaziun absoluta da la taxaziun da 15 onns – cun excepziun dal chantun Grischun. A chaschun da la revisiun parziala da la lescha da taglia da l'onn 1996 è vegnì fixà in termin da 10 onns.

Sco che la pratica mussa ussa è il termin da 10 onns memia curt. En cas, nua che la constataziun da las entradas e da la facultad suttamessas a la taglia pretenda scleriments fitg voluminus, po la surannaziun da la taxaziun entrar en vigur avant ch'ils fatgs decisivs han pudì vegnir sclerids. Quai po capitar en cas da dispitas da dretg civil, en cas da proceduras da dretg penal u en cas d'investigaziuns da dretg fiscal tar grevas cuntravenziuns fiscalas.

En sia missiva al cussegl grond propona la regenza da prolungar il termin per la surannaziun absoluta da la taxaziun sin 15 onns. La nova regulaziun duai vegnir applitgada immediatamain e per tut ils cas da taglia pendents. Il cussegl grond vegn a tractar questa fatschenta en la sessiun da zercladur 2013. 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun