Tar las preparativas per la stagiun da pestga tutga er la retratga da la patenta da pestga. Per pudair retrair la patenta per in onn u ina patenta mensila ston ins cumprovar ch'ins haja enconuschientschas da la pestga (attest obligatoric SaNa). Per quest intent vegnan purschids il mument en differents lieus dal chantun Grischun curs da scolaziun.

Tut las patentas pon vegnir retratgas sco fin ussa tar il museum da la natira dal Grischun a Cuira (mardi fin sonda e supplementarmain glindesdi, ils 29 d'avrigl 2013: da las 10.00 fin las 17.00) sco er tar la surveglianza da pestga durant las uras da biro.

Al spurtegl dal museum da la natira dal Grischun a Cuira ed en ils districts da pestga 1 (Vorderrhein), 3 (Landquart, Landwasser, Alvra), 4 (En, Maira), 5 (En, Rom), 6 (Poschiavino) e 7 (Moesa, Rain posteriur, Valrag) èsi er pussaivel da da pajar cun MaestroCard u cun PostCard (naginas cartas da credit).

En il fegl uffizial dal chantun Grischun dals 28 da mars 2013 e sin la pagina d'internet da l'uffizi da chatscha e pestga www.jagd-fischerei.gr.ch èn publitgadas per ils singuls districts da pestga ils lieus, ils termins sco er las premissas per pudair retrair ina patenta. Sche terzas persunas vulan retrair patentas per persunas cun domicil en il chantun Grischun, ston ellas preschentar in attest da domicil persunal da questas persunas. Formulars correspundents pon vegnir chargiads giu da la pagina d'internet da l'uffizi da chatscha e pestga. En cas ch'ina persuna fa ina dumonda en scrit per retrair ina patenta, sto ella medemamain agiuntar in attest da domicil.

Buna pestga! 


Gremi: uffizi da chatscha e pestga
Funtauna: rg uffizi da chatscha e pestga