En il rom d'ina pitschna ceremonia han suttascrit oz a Cuira il cusseglier guvernativ dal Grischun Martin Jäger, la cussegliera guvernativa da Friburg Isabelle Chassot, il rectur da l'universitad da Friburg, Guido Vergauwen, ed il rectur da la scola auta da pedagogia dal Grischun, Johannes Flury, dus contracts davart ina professura per rumantsch a l'universitad da Friburg.

Il pensiunament da professer Georges Darms, titular da la professura per la lingua e cultura rumantscha a l'universitad da Friburg, sco er il pensiunament che sa mussa da ses collega a l'universitad da Turitg, professer Clà Riatsch, han chaschunà discussiuns en la cuminanza linguistica rumantscha davart il mantegniment da la retoromanistica sco rom universitar independent. Il departament d'educaziun, cultura e protecziun da l'ambient dal chantun Grischun (DECA) ha gia incumbensà l'atun 2011 la Lia rumantscha da fundar ina gruppa da lavur. Communablamain cun las universitads da Friburg e da Turitg sco er cun las scolas autas da pedagogia da Turitg, da Son Gagl e dal Grischun èn vegnidas elavuradas recumandaziuns per mauns dal departament.
Sin basa da las enconuschientschas da la gruppa da lavur èn sa cunvegnids ils chantuns Friburg ed il Grischun sco er l'universitad da Friburg e la scola auta da pedagogia dal Grischun sin dus contracts davart ina professura per rumantsch a l'universitad da Friburg. Las convenziuns han la finamira da garantir a lunga vista la scolaziun universitara (studis da bachelor, da master e da doctorat) en rumantsch sco er la collavuraziun tranter l'universitad da Friburg e la scola auta da pedagogia dal Grischun en la scolaziun, en la furmaziun supplementara sco er en la perscrutaziun ed en il svilup. Plinavant vegn integrà anc pli fitg l'institut da plurilinguitad da Friburg.
Las convenziuns èn ina part integrala d'ina strategia surordinada. En il futur vul ins evitar duplicitads tranter ils instituts e tegnair quint dal pitschen dumber da studentas e students da rumantsch en l'entira Svizra. Entant che l'universitad da Turitg metta vinavant la litteratura rumantscha en il center, sa deditgescha la professura a Friburg a temas linguistics e didactics sco er a dumondas da la plurilinguitad.
Questas experientschas fatgas tar la coordinaziun da la scolaziun academica tar il rumantsch pudessan servir in di er sco basa per elavurar ina strategia generala per il talian. 
 
Remartga:
Davart quest tema stat a disposiziun in video sut www.gr.ch. 
 

Infurmaziuns:
Martin Jäger, schef dal departament d'educaziun, cultura e protecziun da l'ambient,
tel. 081 257 27 01 
 

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient