La regenza grischuna garantescha la cussegliaziun e l'infurmaziun da victimas d'anteriuras mesiras repressivas per motivs da provediment. Plinavant ha la regenza deliberà var 27,8 milliuns francs per lavurs da construcziun sin la rait da vias dal Grischun. 

Occurrenza commemorativa ed agid per las victimas d'anteriuras arbitrariadads da las autoritads
Oz, ils 11 d'avrigl 2013, ha lieu a Berna in'occurrenza commemorativa naziunala cun la cussegliera federala Simonetta Sommaruga per las victimas d'anteriuras mesiras repressivas per motivs da provediment sco er d'anteriurs plazzaments en terzas famiglias. Envidads èn uffants plazzads pli baud en terzas famiglias u en chasas d'uffants, persunas internadas tras las autoritads, persunas sterilisadas sfurzadamain sco er autras victimas da mesiras repressivas per motivs da provediment. La confederaziun, ils chantuns, las citads e las vischnancas, las baselgias chantunalas, l'uniun purila svizra e represchentanzas d'instituziuns da chasas d'uffants vulessan prestar uschia ina contribuziun per renconuscher las circumstanzas difficilas, en las qualas las persunas pertutgadas èn creschidas si.
Ultra da questa occurrenza commemorativa duain las victimas er survegnir in agid concret. La regenza grischuna beneventa l'elavuraziun dal tema e las stentas da la confederaziun per reabilitar las persunas pertutgadas. Sco quai che la suprastanza da la conferenza da las directuras e dals directurs chantunals dals affars socials recumonda, vegn nominà er en il chantun Grischun in post da contact per victimas da mesiras repressivas per motivs da provediment, e las persunas pertutgadas survegnan sustegn per prender invista da las actas da quel temp. Sin conclus da la regenza vegn l'uffizi dal servetsch social chantunal (post da cussegliaziun per l'agid a victimas, tel. 081 257 31 50, e-mail: opferhilfe@soa.gr.ch) designà sco post da consultaziun uffizial per dumondas en connex cun mesiras repressivas per motivs da provediment da pli baud e cun anteriurs plazzaments en terzas famiglias. L'archiv dal stadi dal Grischun gida las persunas pertutgadas a tschertgar actas ed a prender invista da talas (tel. 081 257 28 03, e-mail: info@sag.gr.ch).
La pratica da las uschenumnadas mesiras repressivas per motivs da provediment e dals uschenumnads plazzaments en terzas famiglias era usitada en Svizra fin en ils onns 80 dal 20avel tschientaner. Umans che na correspundevan betg a las ideas da las valurs socialas e moralas da quel temp pudevan – sin ordinaziun da las autoritads administrativas – vegnir internads, vul dir mess en instituziuns serradas, ubain vegnir plazzads en terzas famiglias u en chasas d'uffants. Er aborts sfurzads e sterilisaziuns sfurzadas sco er adopziuns sfurzadas èn vegnidas ordinadas. Davart il dumber da persunas che han stuì subir mesiras repressivas per motivs da provediment u plazzaments en terzas famiglias en il chantun Grischun n'èn avant maun naginas datas.
Dapli infurmaziuns sin www.fuersorgerischezwangsmassnahmen.ch  

Elecziuns da la regenza e dal cussegl grond ils 18 da matg 2014
La regenza ha fixà il termin per las elecziuns da la regenza e dal cussegl grond da l'onn 2014. Las elecziuns da renovaziun da la regenza han lieu dumengia, ils 18 da matg 2014, per la perioda d'uffizi dal 1. da schaner 2015 fin ils 31 da december 2018. Il medem di han er lieu las elecziuns dal cussegl grond per la perioda d'uffizi da l'emprim di da la sessiun d'avust 2014 fin al cumenzament da la sessiun d'avust 2018. In eventual segund scrutini per las elecziuns da la regenza e dal cussegl grond vegn fixà per dumengia, ils 15 da zercladur 2014. La repartiziun dals sezs dal cussegl grond sin ils circuls vegn la regenza previsiblamain a concluder il settember 2013.
En consequenza da la refurma chantunala dal territori n'han las elecziuns da las autoritads cirquitalas da princip betg pli lieu, perquai che la perioda d'uffizi da las autoritads cirquitalas (presidentas e presidents cirquitals sco er substituziuns) è vegnida prolungada e finescha la fin da l'onn 2014. In'excepziun furman quels circuls che adempleschan incumbensas delegadas da las vischnancas e che restan corporaziuns da dretg public fin la fin da l'onn 2016. Tge circuls che appartegnan alura definitivamain a questa categoria e che ston perquai realisar elecziuns da renovaziun per las autoritads cirquitalas per la perioda d'uffizi dal 1. d'avust 2014 fin ils 31 da december 2016, n'è betg anc cler. 

La scola da talents Surselva po vegnir manada vinavant
A la scola da talents Surselva a Glion vegn concedida la permissiun per cuntinuar cun il manaschi da scola. Tenor la nova lescha da scola (a partir da l'avust 2013) dovran las instituziuns ch'èn responsablas per la scola ina permissiun da la regenza per manar classas da talents. Fin ussa è la scola da talents Surselva vegnida manada sco soluziun speziala cun l'approvaziun da l'inspecturat districtual. La scola sin il stgalim secundar I pussibilitescha ina promoziun speziala d'uffants cun talents sportivs u artistics. Ella ha avert sias portas l'avust 2009. 

"Bike to Work" er quest onn
L'administraziun chantunala sa participescha l'onn 2013 danovamain a l'acziun "Bike to Work" da la Pro velo Svizra. L'uffizi da sanadad realisescha l'acziun en il rom dal program "grischun en moviment". Tras questa acziun vegnan las collavuraturas ed ils collavuraturs intimads da sa participar ad in'equipa da quatter e da s'obligar da prender il velo per ir a lavurar, e quai durant almain la mesadad dals dis da lavur dal mais da zercladur. Pussaivla è er ina cumbinaziun tranter traffic public e velo. Il zercladur 2012 han 73 equipas da l'administraziun chantunala cun stgars 300 participantas e participants fatg tut en tut var 32 000 kilometers. 
 

Da vischnancas e da regiuns

• Domat: La revisiun parziala da la planisaziun locala da la vischnanca da Domat, ch'è vegnida concludida ils 17 da zercladur 2012, vegn approvada. I sa tracta da la fasa 2 da la revisiun totala da la planisaziun locala. Tar singuls meds da planisaziun èn vegnidas fatgas resalvas. La procedura d'approvaziun per l'engrondiment da la zona d'industria A en il territori sid da la Ems Chemie SA vegn sistida, fin che la permissiun da runcar correspundenta è avant maun.
• Breil: La revisiun parziala da la planisaziun locala da la vischnanca da Breil, ch'è vegnida concludida ils 30 da november 2012, vegn approvada. Cun ils meds da planisaziun vegnan enzonadas parcellas en la fracziun da Danis per projects da construcziun.
• Alvaschagn / Grischun central: L'adattaziun dal plan directiv regiunal "Concept per l'explotaziun e la reutilisaziun da material, chava da crappa Frasteals, vischnanca d'Alvaschagn", che la corporaziun regiunala Grischun central ha concludì ils 22 da november 2012, vegn approvada. Tras l'adattaziun vegnan stgaffidas en il plan directiv las premissas per reactivar ed engrondir in'anteriura chava da crappa en il territori da Frasteals (Alvaschagn).
• Circul da Belfort: La revisiun parziala da la constituziun dal circul da Belfort dals 3 da mars 2013 vegn approvada. Il motiv per la revisiun parziala è stada la refurma chantunala dal territori.

Projects da vias
La regenza ha approvà 27 772 000 francs per lavurs da construcziun sin ils suandants trajects:
- via da Val S. Pieder: lavurs d'impressari, renovaziun dal traject, Mulin da Pitasch – Bogn da Peiden
- via dal Meir: lavurs d'impressari e da cuvrida, tunnel d'Alvaschagn – Casti
- via da Samignun: lavurs d'impressari e da cuvrida, Laubtal – Mulin da Spiss
- via dal Güglia: lavurs d'impressari, correcziun da la via, Stettli – Parpan
- via dal pass dal Fuorn: lavurs d'impressari, correcziun da la via, Zernez – Ova dal Sagl
- via da Surin: lavurs d'impressari, punt dal Glogn – Surin
- via sursilvana: lavurs d'impressari, correcziun da la via, Rabius – Sumvitg
- via sursilvana: lavurs da cuvrida, correcziun da la via, Trin Mulin – Felsbach
- via da la Lumnezia: lavurs d'impressari, reparaziun da la drenascha, traject Uresa – Plaun da Pors
- via da la Lumnezia: lavurs da cuvrida, Glion – Vrin incl. vias lateralas
- via da Breil: lavurs d'impressari, Dardin – Breil
- via da Claustra: lavurs d'impressari e da cuvrida, Claustra Vitg 2013, aual da Schlappin – Rüefa
- A28, via naziunala Partenz: industria secundara da construcziun (portas da metal), sviament da Küblis
- A28, via naziunala Partenz: mesiraziun da l'entir project dal sviament da Saas, Trun – Pagrüeg
- via d'Avras: lavurs d'impressari, galaria Davains 1 – Calantgil
- via d'Engiadina: lavurs d'impressari e da cuvrida, Plan d'En – Chavrigls
- via da Scharàns: lavurs da cuvrida, aual da Clusa – Scharàns
- via sursilvana da la vart dretga dal Rain: lavurs d'impressari e da cuvrida, Valendau – Rütland
- via dal Lucmagn: lavurs d'impressari, galaria Val da Crusch – Platta

Plinavant ha la regenza approvà in project da la vischnanca da Valsot per construir ina fermada per il traffic public (terminal da bus) sper la via d'Engiadina a Martina. Als custs vegn pajada ina contribuziun da maximalmain 153 234 francs. 


Gremi: regenza
Funtauna: rg chanzlia chantunala dal Grischun