La regenza grischuna ha approvà in nov concept da scolaziun da l'Academia Engiadina che permetta da cumbinar meglier la scola ed il sport. Ultra da quai è ella sa fatschentada cun differentas fatschentas da vischnancas e da regiuns. 

L'Academia Engiadina po prolungar il temp da scola per sportistas e sportists
La regenza ha dà a l'Academia Engiadina a Samedan la permissiun per in nov concept da scolaziun per pudair prolungar per in onn il temp da scola al gimnasi ed a la scola media spezialisada cun ils champs professiunals sanadad e pedagogia. La purschida cumenza cun l'onn da scola 2013/2014 e sa drizza a scolaras ed a scolars dal gimnasi e da la scola media spezialisada da l'Academia Engiadina che vulan cumbinar optimalmain la scola ed il sport en las spartas passlung, biatlon e sigl cun skis. La prolungaziun da la scolaziun sa basa sin il concept ch'ils dus ultims onns da scola vegnan prolungads da dus a trais onns tras spustaments en la tavla da lecziuns. Tar las dotaziuns totalas da las lecziuns e tar ils cuntegns d'instrucziun na datti dentant naginas midadas. La scola decida sco ultima instanza davart entradas en il program da trais onns. Per il chantun na resultan nagins custs supplementars.
La prolungaziun da la scolaziun duai pussibilitar a sportistas ed a sportists da prestaziun da cuntanscher lur finamiras sportivas senza stuair acceptar deficits tar l'acquist d'ina vasta furmaziun generala. La purschida è ina cumplettaziun da las scolas medias da sport e da musica existentas en il chantun. Il concept a la scola media spezialisada da l'Academia Engiadina vegn approvà provisoricamain cun la resalva ch'ils diploms survegnian anc la renconuschientscha mancanta da la conferenza svizra dals directurs chantunals da l'educaziun publica (CDEP). 

Abolì il referendum extraordinari da las autoritads per il 1. da matg 2013
Ils 3 da mars 2013 ha il suveran grischun acceptà ina revisiun da l'art. 16 cifra 6 da la constituziun chantunala, cun la quala il referendum extraordinari da las autoritads è vegnì abolì. Sin conclus da la regenza vegn la revisiun parziala da la constituziun chantunala, ch'è vegnida approvada dal pievel, messa en vigur per il 1. da matg 2013. 
 

Da vischnancas e da regiuns

• Churwalden: A la vischnanca da Churwalden vegn garantida ina contribuziun da maximalmain 691 775 francs per il project da colliaziun cun la serenera a Cuira. Suenter ch'il conduct da colliaziun è mess en funcziun, vegn demontada la serenera existenta Parzutt da la vischnanca da Churwalden. Questa serenera è ussa antiquada. La vischnanca ha approvà il project da colliaziun en ina decisiun da princip dals 25 da mars 2011. 
• Mundaun: A la vischnanca da Mundaun vegn garantida ina contribuziun chantunala da maximalmain 155 000 francs als custs per construir la via champestra nr. 1, Surcuolm-Bündner Rigi, 2. part. Quai cun resalva d'ina contribuziun federala.
• Alvagni: La revisiun parziala da la constituziun communala da la vischnanca d'Alvagni dals 22 da mars 2013 vegn approvada.
• Circul d'Engiadin'ota: Las revisiuns parzialas da la constituziun dal circul d'Engiadin'ota dals 30 da november 2008, dals 13 da zercladur 2010, dals 17 da zercladur 2012 e dals 23 da settember 2012 vegnan approvadas. Tras las revisiuns èn vegnidas extendidas las disposiziuns davart las incumbensas dal circul sco corporaziun regiunala.

Projects da vias
La regenza ha approvà 9,41 milliuns francs per lavurs da construcziun sin ils suandants trajects:
- via da l'Alvra: lavurs d'impressari, Preda – Palpuogna
- via dal Bernina: lavurs da cuvrida, Palü Granda – La Rösa
- via da Calanca: lavurs d'impressari, Grono – Pianecc
- via da Calanca: lavurs d'impressari, Molina – access da Buseno
- via da la Chlus: lavurs da cuvrida, Grüsch – Fuchsenwinkel
- via taliana: lavurs d'impressari, Malabarba – Viganaia
- via da Jenins: lavurs d'impressari e da cuvrida, Teilerrüfi – plazza da parcar Chrützli
- via dal Lucmagn: lavurs da cuvrida sin il traject Curaglia – Platta
- via dal Malögia: lavurs da cuvrida en il vitg da Malögia
- via sursilvana da la vart dretga dal Rain: lavurs d'impressari, punt da la chavorgia da Versomi – Chera 
  

Gremi: regenza
Funtauna: rg chanzlia chantunala dal Grischun