L'uffizi federal da migraziun ha serrà ils 19 d'avrigl 2013 l'alloschi d'asil a Sufers en il chantun Grischun suenter sis mais, uschia sco che quai è stà cunvegnì cun il departament federal da defensiun, protecziun da la populaziun e sport (DDPS), cun il chantun Grischun e cun la vischnanca da Sufers. L'alloschi federal ha pudì vegnir manà per gronda part senza problems. La vischnanca ha apprezià ils engaschaments da lavur dals requirents d'asil.
En il stabiliment sutterran èn vegnids tgirads l'ultim mez onn circa 80 requirents d'asil per mais. Ils requirents d'asil han pudì contribuir lur part per la communitad da la vischnanca da Sufers che ha var 130 abitantas ed abitants: els han reparà sendas da viandar, han rumì pastgiras e guauds, han fatg si laina dad arder, han palà naiv ed han dà si colur als barcuns da la chasa communala.
Cun excepziun da paucs cas d'enguladitsch il cumenzament da la gestiun da l'alloschi n'ha la collocaziun dals requirents d'asil a Sufers chaschunà nagins problems. Ina gruppa accumpagnanta ch'è sa cumponida tant da represchentants da la populaziun sco er da las organisaziuns relevantas ha procurà ch'igl ha pudì vegnir reagì svelt cun mesiras adattadas a quests problems.
Durant il manaschi da l'alloschi ha il chantun Grischun pudì realisar repatriaments en il rom da la procedura da Dublin directamain davent da Sufers. L'onn 2013 vegn el a profitar d'ina attribuziun reducida da novs petents.
Ils posts cumpetents da la confederaziun e dal chantun engrazian a la suprastanza communala ed a la populaziun da Sufers per lur prontezza spontana e per lur chapientscha da collocar requirents d'asil en lur vischnanca.
Per il 1. da matg 2013 stat l'alloschi puspè a disposiziun a l'armada.
Ulteriuras infurmaziuns chattais Vus en l'internet sin
www.ejpd.admin.ch.
Infurmaziuns:
-Sibylle Siegwart, uffizi federal da migraziun, tel. 031 325 85 02,
sibylle.siegwart@bfm.admin.ch
-Sonja Margelist, pledadra dal DDPS, tel. 031 324 88 75,
sonja.margelist@gs-vbs.admin.ch
-Christian Rathgeb, schef dal departament da giustia, segirezza e sanadad dal Grischun, tel. 081 257 25 01,
christian.rathgeb@djsg.gr.ch
-Marcel Suter, manader da l'uffizi da migraziun e da dretg civil dal Grischun, tel. 081 257 25 21,
marcel.suter@afm.gr.ch
Remartga:
Davart quest tema stat a disposiziun in video sut
www.gr.ch.
Fotografia agiuntada:
Scuntrada per la fin (da sanestra): divisiunari Marco Cantieni, Urs von Daeniken, manader da project per ils alloschis federals, uffizi federal da migraziun, Thomas Lechner, president communal da Sufers e cusseglier guvernativ Christian Rathgeb, schef dal departament da giustia, segirezza e sanadad dal Grischun, davant la chasa grischa a Cuira.
Gremi: uffizi federal da migraziun / departament da giustia, segirezza e sanadad dal Grischun
Funtauna: rg uffizi federal da migraziun / departament da giustia, segirezza e sanadad dal Grischun