La regenza grischuna prenda posiziun davart la necessitad d'in segund tunnel tras il Gottard. Ultra da quai ha ella tractà differentas fatschentas da vischnancas e da regiuns. 

Sanaziun dal tunnel da via tras il Gottard
Concernent la dumonda da princip davart la necessitad d'in segund tunnel tras il Gottard s'exprima la regenza cleramain en il senn dal cussegl federal. Quel propona al parlament da construir in segund tunnel en connex cun la sanaziun dal tunnel da via existent. Cunquai ch'i n'è dentant betg necessari pervia dal traffic e politicamain betg responsabel d'augmentar la capacitad cun in nov tunnel, sustegna la regenza dal tuttafatg la restricziun da la capacitad proponida. Sco gia preschentà pliras giadas en il rom da contacts cun la confederaziun, refusa il chantun Grischun percunter decididamain traffic supplementar durant in temp pli lung sin la ruta dal San Bernardin. Questa via alpina dal pass n'è betg adattada per il traffic pesant ed è malsegira ord vista da la segirezza dal traffic. Autras alternativas davart la proposta dal cussegl federal chaschunassan traffic da sviament betg acceptabel cun consequenzas negativas per l'economia dals chantuns vischins – pia er per il Grischun.
La finala prenda la regenza er posiziun davart la preschentaziun dal cussegl federal areguard las taxas da vias. Il tunnel da via tras il Gottard duai vegnir tractà tuttina sco tut ils auters trajects da vias naziunalas. Tenor la regenza n'èsi betg giustifitgà d'introducir ina taxa supplementara per il tunnel, er betg sche l'assamblea federala fiss cumpetenta da far quai tenor la constituziun. Anzi duai il princip da l'exemziun da taxas valair vinavant cumplainamain per l'utilisaziun da las vias. 

Las scolaras ed ils scolars da l'emprima classa da Laax pon midar al sursilvan
La regenza ha approvà ina dumonda da la vischnanca da Laax en connex cun l'introducziun dal sursilvan sco lingua d'alfabetisaziun en la scola primara. Las scolaras ed ils scolars da l'emprima classa actuala pon midar pass per pass en las ultimas emnas da scola da l'onn da scola 2012/13 da rumantsch grischun al sursilvan. Applitgond la nova lescha da scola po la lingua da scola en scolas rumantschas vegnir midada a partir da l'avust 2013 mo pli pass per pass d'onn da scola ad onn da scola.
La vischnanca da Laax ha introducì rumantsch grischun en scola sco vischnanca da piunier l'onn da scola 2007/08. Ils 12 d'avrigl 2013 han las votantas ed ils votants da la vischnanca da Laax decidì da turnar al sursilvan en scola primara. 
 

Da vischnancas e da regiuns 

• Ziràn-Reschen: La revisiun parziala da la planisaziun locala da la vischnanca da Ziràn-Reschen dals 14 da december 2012 vegn approvada. Sco meds da planisaziun èn vegnids deliberads la lescha da construcziun sco er ils plans da zonas ed ils plans generals da furmaziun 1:1000 ed 1:10 000.
• Furna: Il project "Via da guaud Alpeggen" da la vischnanca da Furna vegn approvà. Als custs vegn garantida ina contribuziun da maximalmain 292 600 francs. Il project cuntegna la construcziun d'ina nova via da guaud da 750 meters lunghezza per pudair utilisar e tgirar en moda effizienta il guaud.
• Alvagni, Schmitten, Surava: La revisiun parziala dals statuts dal consorzi da scola Belfort Dadens vegn approvada. Il cussegl da scola vegn uschia reducì da 6 a 3 commembers. 

Projects da vias
La regenza ha approvà 2 312 000 francs per lavurs da construcziun sin ils suandants trajects:
- via da l'Alvra: lavurs da cuvrida, Pro Quarta – Alvagni Bogn
- via dad Oberrealta: lavurs d'impressari, Unterrealta – Oberrealta
- via dal Pass dal Spleia: lavurs d'impressari e da cuvrida, punt Bodmastafel 1 
 

Gremi: regenza
Funtauna: rg chanzlia chantunala dal Grischun