Bunamain 850 scolaras e scolars han absolvì ils 12 da favrer ed ils 19 da mars 2013 ils examens d'admissiun chantunals per il gimnasi sco er per la scola media professiunala e commerziala. Malgrà il grond dumber d'annunzias han ils examens d'admissiun pudì vegnir manads tras senza incaps en tut ils lieus d'examen. 

Ils examens d'admissiun chantunals per entrar en il gimnasi sco er en la scola media professiunala e commerziala han gì lieu er quest onn il medem temp en ils differents lieus da scolas medias. Grazia a la buna preparaziun da tut las persunas participadas han ils examens d'admissiun pudì vegnir manads tras senza incaps en tut ils lieus d'examen. Tut en tut han 843 scolaras e scolars fatg questa primavaira ils examens d'admissiun chantunals a las scolas medias grischunas. En cumparegliaziun cun l'onn precedent – cura che var 870 candidatas e candidats eran vegnids dumbrads – signifitgescha quai ina pitschna reducziun. Quella sa mova dentant en il rom da las variaziuns annualas natiralas.

Da las 433 scolaras e scolars primars che han fatg ils 12 da favrer 2013 in examen d'admissiun per la 1. classa dal gimnasi da lunga durada han 240 dastgà s'allegrar d'ina decisiun d'examen positiva. L'onn passà è quai stà il cas per 286 da 479 candidatas e candidats.

Ils 19 da mars 2013 ha gì lieu l'uschenumnà examen unifitgà per l'entrada en la 3. classa dal gimnasi da lunga durada sco er per l'entrada en la 1. classa da la scola media professiunala u commerziala. Da quest examen han fatg part quest onn 410 scolaras e scolars. Da quels han 184 ademplì ils criteris d'admissiun per l'entrada en la 3. classa gimnasiala. Ulteriuras 96 scolaras e scolars èn sa qualifitgads per l'entrada en la 1. classa da la scola media professiunala u commerziala. Ils dumbers d'admissiuns sa chattan uschia sin quest stgalim levamain sur quel da l'onn precedent cura che 169 da 389 scolaras e scolars examinads han pudì entrar en la 3. classa dal gimnasi e 90 candidatas e candidats han survegnì ina decisiun positiva per entrar en la scola media commerziala u professiunala.

Ils giuvenils ch'èn sa decidids per la scolaziun a la scola media commerziala u professiunala vegnan anc a frequentar il 9. onn da scola en la scola populara e consequentamain per regla pir entrar il cumenzament da l'onn da scola 2014/15 en ina scola media grischuna. Las gimnasiastas ed ils gimnasiasts futurs vegnan percunter a cuntinuar lur carriera da scola gia il proxim onn da scola en ils gimnasis da curta e lunga durada dal Grischun. 
 

Infurmaziuns:
dr. Hans Peter Märchy, manader da l'uffizi per la furmaziun media-superiura, tel. 081 257 61 65, e-mail Hans.Peter.Maerchy@ahb.gr.ch  
 

Gremi: uffizi per la furmaziun media-superiura
Funtauna: rg uffizi per la furmaziun media-superiura