L'urs M13 vegn exponì en il Museo Poschiavino. La regenza grischuna surlascha il fol preparà da l'urs al museum a Puschlav sco regal. Ultra da quai ha la regenza nominà en sia ultima sesida in cumissari da la regenza per la vischnanca da S. Martin. 

L'urs M13 turna en il Puschlav
L'urs privlus M13 ch'è vegnì sajettà da la surveglianza da chatscha ils 19 da favrer 2013 en il Puschlav vegn surlaschà al Museo Poschiavino sco regal. La regenza ha approvà ina dumonda respectiva dal museum en il Puschlav. M13 duai vegnir exponì en il Museo Poschiavino sco preparat e contribuir ad ina discussiun objectiva davart il tema da l'urs.
L'urs brin M13 è immigrà en il Grischun il cumenzament d'avrigl 2012 ed ha vivì a partir dal cumenzament da fanadur 2012 oravant tut en il Puschlav. Perquai ch'il giuven urs selvadi è daventà ina ristga per l'uman è el vegnì sajettà ils 19 da favrer 2013 sin basa dal concept davart l'urs en Svizra. En il fratemp ha il museum da la natira dal Grischun a Cuira prendì las mesiras biometricas dal corp da l'urs brin, allontanà las parts dal skelet e preparà ses fol. 

Territori da promoziun Alvra
La regenza ha prendì posiziun tar ina dumonda da la vischnanca da Schmitten sco er tar ina dumonda dal project da fusiun Alvra (che cumpiglia las vischnancas dad Alvagni, Alvaschagn, Brinzauls, Lantsch, Mon, Stierva, Surava e Casti). Entant che la vischnanca da Schmitten ha supplitgà d'adattar il territori da promoziun en vista ad ina fusiun cun la vischnanca da Tavau ch'è vegnida preferida a la radunanza communala, ha il project da fusiun Alvra pretendì clerezza per pudair insumma cuntinuar cun il project current. La regenza sustegna il project da fusiun en il territori da promoziun Alvra sco quai ch'el è vegnì preschentà en il rapport ed en la missiva tar la refurma da vischnancas e dal territori (carnet nr. 8/2010 – 2011, p. 645, Link) e na vesa actualmain nagin motiv da l'adattar. Entaifer ils territoris da promoziun promova la regenza fusiuns da vischnancas, independentamain da la dumonda, sche tut las vischnancas fusiuneschan u mo ina part da quellas. Las decisiuns ch'èn vegnidas prendidas fin ussa en ils secturs politics (p.ex. in stgalim superiur cuminaivel Val d'Alvra, in manaschi forestal e tecnic cuminaivel) e betg sco ultim ils resultats da las votaziuns dals 22 da mars 2013 mussan ch'il territori da promoziun correspunda ad ina finamira structurala da la gronda maioritad da la populaziun da la Val d'Alvra. 

Numnà in cumissari da la regenza per S. Martin
La regenza dal chantun Grischun ha concludì en sia sesida dals 30 d'avrigl 2013 da numnar in cumissari da la regenza per la vischnanca da S. Martin. La suprastanza communala da S. Martin da sia vart ha dumandà l'installaziun d'in cumissari da la regenza. Il motiv èn renfatschas da la cumissiun communala da gestiun a l'adressa da la suprastanza communala resp. dal president communal da S. Martin. Il cumissari da la regenza sto examinar pli detagliadamain, sche las renfatschas èn plausiblas e motivadas e trair las conclusiuns necessarias. Fin il pli tard la fin da fanadur 2013 sto il cumissari da la regenza preschentar a la regenza in rapport davart ses scleriments sco er davart sias conclusiuns. Alura vegni ad esser l'incumbensa da la regenza da prender las mesiras ch'èn eventualmain necessarias. Sco cumissari da la regenza è vegnì numnà signur Thomas Nievergelt, advocat, Samedan. Sco anteriur president communal enconuscha el fitg bain il dretg communal grischun. Ils custs en chaussa ston vegnir surpigliads da la vischnanca da S. Martin. 

Scolaziun da bachelor en "hospitality" a Passugg
La scola auta Ecole hôtelière de Lausanne (EHL) survegn ina permissiun da manaschi per ina scolaziun da bachelor en "hospitality" a la scola a Passugg che dastga vegnir frequentada d'absolventas e d'absolvents che han fatg cun success la scolaziun ad ina hoteliera-restauratura diplomada SSS u ad in hotelier-restauratur diplomà SSS. Ils gremis responsabels da la scola auta e da la Haute Ecole Spécialisée de Suisse occidental associada (HES-SO), da la scola auta spezialisada da la Svizra orientala (SASSO) sco er da la confederaziun ston anc approvar questa purschida da scolaziun. Ina purschida da scolaziun attractiva da la EHL en il sectur da bachelor che po vegnir frequentada da las absolventas e dals absolvents da la scola spezialisada superiura per hotellaria rinforza tenor l'avis da la regenza il Grischun sco lieu da scolaziun sco er l'hotellaria da la Svizra tudestga. 

Repartì ils meds finanzials da las taxas da patenta d'alcohol e da la dieschma d'alcohol
Dal retgav net da las taxas chantunalas da patenta d'alcohol vegnan pajads quest onn 407 470 francs ad intents d'utilitad publica. Sustegnids vegnan uschia 17 organisaziuns, fundaziuns, uniuns, fonds e projects en quest sectur.
Da la dieschma d'alcohol da la confederaziun stattan a disposiziun al chantun quest onn 584 766 francs. Quest import è deditgà al cumbat da l'alcoholissem en ses motivs ed en sias consequenzas sco er al cumbat da l'abus da tissis enivrants, da narcotics e da medicaments. Tranter auter vegn sustegnì il program grischun d'alcohol 2013-2016 cun quests daners. Tenor la lescha federala d'alcohol va il retgav net da l'administraziun federala d'alcohol per 90 pertschient a la confederaziun e per 10 pertschient als chantuns (dieschma d'alcohol). 

Fixà l'utilisaziun da la collecta da la rogaziun federala 2013
Il di da la rogaziun federala vegn fatga en tut las baselgias dal chantun ina collecta per intents d'utilitad publica. L'utilisaziun vegn determinada da la regenza. Mintgamai in terz dal retgav da la collecta da la rogaziun federala 2013 va a la crusch blaua dal Grischun, a TECUM accumpagnament da persunas grevamain malsaunas e muribundas sco er a l'Associaziun dals confamigliars da persunas cun schizofrenia e cun disturbis psichics. 
 

Da vischnancas e da regiuns

• Glion: La cunvegna ch'è vegnida concludida ils 16 da november 2012 da las vischnancas da Castrisch, Duin, Glion, Ladir, Luven, Pigniu, Pitasch, Riein, Rueun, Ruschein, Schnaus, Sevgein e Siat per fusiunar questas vischnancas a la nova vischnanca da Glion per il 1. da schaner 2014 vegn approvada. Questa fusiun sto anc vegnir approvada dal cussegl grond.
• Tujetsch: La revisiun parziala da la planisaziun locala, concludida da la vischnanca da Tujetsch ils 23 da settember 2012, vegn approvada cun correcturas minimalas (revisiun parziala dal plan da zonas e dal plan general da furmaziun 1:2000 Alpsu, revisiun parziala dal plan da zonas 1:10 000 Alpsu).
• Ruschein: A la vischnanca da Ruschein vegn garantida ina contribuziun chantunala da maximalmain 210 800 francs als custs per construir la via champestra nr. 1, Acla Rodunda-Vitg, 2. part. Quai cun resalva d'ina contribuziun federala.
• Guarda: La via da Guarda tranter Valletta (kilometer 2,010) ed Avant Porta / fin da la via chantunala (kilometer 2,915) vegn cedida a la vischnanca da Guarda sco proprietad e per il mantegniment per il 1. da zercladur 2013. La regenza ademplescha uschia ina dumonda da la vischnanca che vul introducir mesiras per reducir il traffic en il vitg.
• Rueun: Il project da la vischnanca da Rueun concernent la construcziun d'ina fermada per il traffic public a la via sursilvana en il territori da Gula vegn approvà. Als custs vegn pajada ina contribuziun chantunala da maximalmain 47 508 francs.
• Trun: Il project per construir in rempar en la Val Sinzera en la vischnanca da Trun vegn approvà. Il project cuntegna la reparaziun e la meglieraziun da la dustanza existenta. Als custs vegn garantida ina contribuziun chantunala maximala da totalmain 421 600 francs.

Projects da vias

• La concurrenza da projects publica per las lavurs d'inschigneria per construir ina nova punt sur il Rain a Glion vest en il rom dal sviament da Glion è decidida. Sa basond sin in rapport da la giuria ha la regenza tschernì il project "MUDEST" da la cuminanza d'inschigneria Chitvanni + Wille ScRL, Cuira / Casutt Wyrsch Zwicky SA, Cuira, per l'ulteriura elavuraziun ed ha surdà l'incumbensa respectiva. Link al fegl d'infurmaziun da l'uffizi da construcziun bassa dal Grischun.
• Il project d'exposiziun per curreger la via da Seewis, traject spartavias Jugendhaus – Motschna (kilometer 3,57 fin 4,68), vegn approvà. La finamira dal project èn la renovaziun, il schlargiament ed il rinforzament da la via sco er in augment da la segirezza dal traffic.

Ultra da quai ha la regenza approvà 3 421 000 francs per lavurs da construcziun sin ils suandants trajects:
- via dal pass dal Fuorn: reparaziun dals tetgs da las galarias da lavinas La Serra 1 e 2 en il rom da la correcziun da la via Zernez – Ova dal Sagl
- via sursilvana: lavurs da cuvrida, correcziun da la via, Rabius – Sumvitg 


Gremi: regenza
Funtauna: rg chanzlia chantunala dal Grischun