Ils novs sistems d'informatica da l'economia da manaschi per finanzas e contabilitad sco er per ils fatgs da persunal dal chantun Grischun pon vegnir realisads en il rom dals custs previs. Sco planisà ha il manaschi productiv da las cumponentas centralas da tuts dus sistems cumenzà – suenter ina durada dal project da var 15 mais – punctualmain per il 1. da schaner 2013. Il medem mument è vegnì introducì il nov standard da rendaquint MAC2.

La publicaziun uffiziala per ils novs sistems d'informatica fatga l'onn 2011 ha gudagnà l'interpresa da servetschs d'informatica FRITZ & MACZIOL (Svizra) SA, Turitg, ensemen cun la Soreco SA, Schwerzenbach. Tar il project general aveva FRITZ & MACZIOL la rolla da l'interpresa generala ed era furnitura ed integratura da newsystem public, la soluziun per finanzas e contabilitad. La firma da software Soreco da sia vart aveva la responsabladad d'introducir sia soluziun per administrar il persunal Xpert.HRM. Da vart dal chantun han gidà essenzialmain en spezial collavuraturas e collavuraturs da l'administraziun da finanzas, da l'uffizi da persunal e da l'uffizi d'informatica ch'il sistem ha pudì vegnir introducì cun success.

Cun la soluziun da finanzas newsystem public lavuran actualmain 270 utilisadras ed utilisaders en ils 38 uffizis chantunals. Xpert.HRM vegn duvrà da circa 650 collavuraturas e collavuraturs en lur funcziun d'autoritad superiura per l'administraziun dal persunal. Cun quest sistem vegnan er administrads ils salaris dals passa 3500 collavuraturas e collavuraturs. L'introducziun dals novs sistems è per l'administraziun chantunala dapli che la substituziun da sistems daventads vegls. Igl èn er vegnidas stgaffidas las premissas tecnicas per process administrativs cumplessivs e per servetschs futurs per l'e-government per la populaziun e per interpresas. 

Betg duvrà tut ils meds finanzials
Cun il preventiv 2011 ha il cussegl grond deliberà per quest project in credit d'impegn da 9,5 milliuns francs per ils onns 2011 fin 2014. Suenter che las cumponentas centralas èn vegnidas realisadas ed èn operativas, po il project vegnir terminà en il rom finanzial e temporar previs. Ina bella part dal credit dal cussegl grond (20-25 %) na vegn betg duvrà. La cussegliera guvernativa Barbara Janom Steiner, scheffa dal departament da finanzas e vischnancas dal chantun Grischun, è sa mussada fitg cuntenta cun l'andament dal project. Quest project ambizius haja mussà ch'igl è pussaivel – grazia al grond engaschament da tut las parts participadas – da realisar projects d'informatica voluminus per il maun public cun success ed entaifer il termin.

Il rest dal temp dal project vegn duvrà per optimar las cumponentas dal sistem gia introducidas e da realisar ils elements mess d'ina vart sco oravant tut il workflow electronic dals crediturs. Il resultat cuntanschì è anc pli legraivel, perquai ch'il èn vegnids introducids il medem mument sco la substituziun dals sistems d'informatica la nova legislaziun davart las finanzas dal chantun Grischun ed il nov standard da rendaquint MAC2, quai che ha rendì quest project anc pli pretensius. 


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas (DFV), tel. 081 257 32 01, e-mail: barbara.janom@dfg.gr.ch 
 

Gremi: departament da finanzas e vischnancas dal Grischun
Funtauna: rg chanzlia chantunala dal Grischun