La regenza dal Principadi da Liechtenstein ha visità oz – sin invitaziun da la regenza grischuna – il chantun Grischun. Igl è stà l'emprim inscunter cun la nova executiva da Liechtenstein manada dal schef da la regenza Adrian Hasler.

Il president da la regenza grischuna Hansjörg Trachsel ha pudì beneventar oz a mezdi a Cuira en la chasa grischa la regenza dal Principadi da Liechtenstein cun ses nov schef Adrian Hasler. Quel è vegnì accumpagnà dal viceschef da la regenza Thomas Zwiefelhofer, da la cussegliera guvernativa Aurelia Frick, dal cusseglier guvernativ Mauro Pedrazzini sco er dal secretari da la regenza Horst Schädler. La regenza grischuna è stada preschenta cumplettamain. Suenter ch'igl è vegnì barattà ils salids uffizials è in gentar cuminaivel stà sin il program.
Las regenzas dal Grischun e dal Liechtenstein han gia adina tgirà stretgas relaziuns amicablas. Spezial vi da l'inscunter dad oz è stà il fatg, che quatter da tschintg commembras e commembers da la regenza da Liechtenstein èn dapi ils 27 da mars 2013 da nov en uffizi. L'emprim inscunter uffizial è stà caracterisà d'ina enclegientscha excellenta. Ultra da quai ha la visita servì a barattar experientschas sin il champ cultural, economic e politic. 


Fotografias agiuntadas:

Il president da la regenza Hansjörg Trachsel retschaiva il schef da la regenza da Liechtenstein Adrian Hasler (a sanestra) en la chasa grischa a Cuira.


Las delegaziuns dal Grischun e da Liechtenstein cun il president da la regenza Hansjörg Trachsel ed il schef da la regenza Adrian Hasler (amez) davant la chasa grischa a Cuira. 


Gremi: chanzlia chantunala dal Grischun
Funtauna: rg chanzlia chantunala dal Grischun