Il register funsil electronic vegn sviluppà vinavant. La regenza grischuna ha avert la consultaziun tar ina revisiun parziala da la lescha introductiva tar il cudesch civil svizzer (register funsil). L'invista en il register funsil e la correspundenza vegnan facilitadas.

Tras ina revisiun parziala da la lescha introductiva tar il cudesch civil svizzer (register funsil) duain las disposiziuns da la confederaziun davart in register funsil informatisà unitar vegnir surpigliadas en il dretg chantunal. Tar la revisiun da la lescha ha la regenza grischuna avert ina consultaziun che dura fin ils 30 d'avust 2013. Principalmain sa tracti da meglierar la funcziun da publicitad d'in register funsil standardisà sco er la correspundenza. Quai grazia a novas pussaivladads electronicas. 

In project naziunal sco punct da partenza
Per l'ina stgaffescha la revisiun las basas legalas per eGRIS (sistem d'infurmaziun electronic per bains immobigliars), in project che vegn actualmain realisà sin plaun federal. Latiers tutga la publicaziun d'ina part da las datas dal register funsil en l'internet. Tenor il nov dretg federal pon la designaziun e la descripziun d'in bain immobigliar, il num e l'identificaziun da la proprietaria u dal proprietari, la furma da proprietad e la data d'acquist vegnir publitgadas en l'internet.

Plinavant vegn introducì in sistem d'infurmaziun electronic per bains immobigliars per l'entira Svizra. Cun il portal d'infurmaziun electronic Terravis è gia vegnì fatg in project da pilot en il Grischun. En il decurs da quest onn duain tut ils uffizis dal register funsil en il chantun esser colliads cun quest portal d'infurmaziun. Terravis n'è betg in portal public. Il dretg d'utilisaziun han persunas da notariat, geometras e geometers, autoritads, bancas, la Posta, cassas da pensiun, assicuranzas sco er advocatas ed advocats.

La plattafurma Terravis duai medemamain permetter en l'avegnir ina correspundenza electronica cun l'uffizi dal register funsil. Er questa novaziun tutga tar il project eGRIS. Uschia daventi p.ex. pussaivel ch'ils uffizis dal register funsil, ils notariats e las bancas liquideschan tranter sai las fatschentas immobigliaras ed ipotecaras sur in'unica interfatscha e – suenter l'introducziun da la documentaziun publica electronica – cumplettamain en il medem sistem. 

Meglierà la gestiun dal register funsil
Per l'autra vegnan fatgas – tras la revisiun da la lescha – autras adattaziuns al dretg federal che na tutgan betg tar il project eGRIS. Uschia duai la procedura da rectificaziun publica ch'è prescritta da nov en il dretg federal vegnir introducida en il dretg chantunal. Ils uffizis dal register funsil pon stizzar en il register funsil inscripziuns che han pers lur impurtanza. Da l'autra vart ston ellas menziunar da nov tscherts causals en il register funsil, sco p.ex. restricziuns da la proprietad dal dretg public. Questas mesiras gidan a survegnir da tut temp infurmaziuns actualas e fidadas davart ils bains immobigliars. 


Remartga:
Dals documents da consultaziun pon ins prender invista en l'internet sut www.gr.ch / Rumantsch / Consultaziuns currentas. 


Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  


Gremi: regenza
Funtauna: rg chanzlia chantunala dal Grischun