A partir dal 1. da schaner 2014 vegnan la confederaziun ed ils chantuns a reglar la promoziun specifica da l'integraziun en il rom da programs chantunals d'integraziun (PCI). Per incumbensa da la regenza ha il post spezialisà per l'integraziun elavurà – en collavuraziun cun differents partenaris – in program correspundent cun mesiras per il chantun Grischun. Il punct da partenza èn stadas las directivas per promover l'integraziun da persunas estras che la regenza aveva deliberà l'onn 2012.

La confederaziun ed ils chantuns èn s'obligads en in document da basa da rinforzar lur stentas a favur da l'integraziun da persunas estras integrond las vischnancas. Per quest intent han els definì parameters e finamiras strategicas per lung dals trais accents tematics "infurmaziun e cussegliaziun", "furmaziun e lavur" sco er "chapientscha ed integraziun sociala", ils quals furman la basa dals programs chantunals d'integraziun dals onns 2014 fin 2017.

Per incumbensa da la regenza e sut la direcziun da las delegadas e dals delegads chantunals da l'integraziun sco er en collavuraziun cun ina gruppa da lavur interdepartamentala è vegnì elavurà in program d'integraziun per il chantun Grischun ensemen cun las vischnancas che demussan ina gronda quota da persunas estras sco er ensemen cun auters partenaris ch'èn relevants per l'integraziun. Quest program sa chapescha da princip sco ulteriur svilup da las "directivas per promover l'integraziun da persunas estras" ch'èn vegnidas deliberadas da la regenza grischuna il favrer 2012, e s'orientescha a las finamiras da la confederaziun sco er als champs d'acziun menziunads en las directivas. Resultà è in pachet da mesiras cumplessiv per ils onns 2014 fin 2017 che tschenta la basa per la confinanziaziun da la confederaziun en il rom dal program da quatter onns e che vegn ad esser il mussavia per la promoziun da l'integraziun en il chantun Grischun per ils proxims onns. 

Ulteriur svilup persistent da la promoziun da l'integraziun
Il program chantunal d'integraziun duai promover ed implementar persistentamain – tras in process cun ina vasta basa – l'ulteriur svilup da la promoziun da l'integraziun da persunas estras en il chantun. Uschia vegnan amplifitgadas cun cleras finamiras las purschidas existentas gia oz per la promoziun da l'integraziun cun mesiras orientadas al basegn, sco ch'i mussan ils exempels qua sutvart: Metter a disposiziun material d'infurmaziun en las linguas discurridas il pli savens en il chantun davart dumondas dal dumagnar il mintgadi, sustegnair las vischnancas ad intermediar emprimas infurmaziuns a persunas ch'èn gist arrivadas, cussegliar persunas cun in basegn d'integraziun particular, amplifitgar regiunalmain e tenor basegn curs da lingua en collavuraziun cun vischnancas e cun uffizis socials, crear la basa per la promoziun tempriva d'uffants dischavantagiads socialmain gia en la vegliadetgna prescolara e sustegnair projects da pilot, promover la collavuraziun cun geniturs da lingua estra en scola, meglierar l'access a la scolaziun ed a la furmaziun per persunas ch'èn arrivadas tard e per giuvenils da lingua estra, rinforzar l'integraziun da patrunas e da patruns en la promoziun da l'integraziun sco er promover projects communals per integrar la populaziun estra.

La finamira dal program chantunal d'integraziun è quella da crear – cun soluziuns pragmaticas ed observond la vicendaivladad dals dretgs e dals duairs – perspectivas da svilup per tut las gruppas da la populaziun en il chantun. 


Agiunta:
directivas per promover l'integraziun da persunas estras 


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
- Patricia Ganter, incumbensada d'integraziun, uffizi da migraziun e da dretg civil, tel. 081 257 36 81, e-mail Patricia.Ganter@afm.gr.ch  
 

Gremi: regenza
Funtauna: rg chanzlia chantunala dal Grischun