La regenza grischuna ha tractà diversas fatschentas communalas e regiunalas. 

Quatter pavigliuns da la scola chantunala Plessur "van" a Lucerna
Il chantun Grischun venda quatter pavigliuns da la scola chantunala Plessur a Cuira per 50 000 francs a la vischnanca politica da Horw en il chantun Lucerna. La vischnanca da Horw ha fatg sco unica in'offerta d'acquisiziun da tuts quatter pavigliuns ed ultra da quai al pretsch il pli aut per object. A Horw vegnan duvradas las totalmain 32 stanzas da scola durant in'emprima fasa sco provisori per l'administraziun communala entant ch'i vegn sanà l'edifizi communal. Suenter vegnan ellas a servir sco locals substitutivs durant la renovaziun e l'engrondiment da la chasa da scola dal stgalim superiur.
La scola chantunala Plessur a Cuira aveva nizzegià ils pavigliuns sco locals provisorics d'instrucziun e da dimora durant la sanaziun. Fin la fin d'avrigl 2014 èn ils quatter pavigliuns anc affittads da la citad da Cuira sco locals da scola temporars. Suenter èn els proprietad da la vischnanca da Horw. 

Nova ordinaziun tar la lescha davart ils servetschs psichiatrics dal Grischun
La lescha davart ils servetschs psichiatrics dal Grischun ch'è entrada en vigur il 1. da schaner 2013 pretenda ina revisiun da l'ordinaziun tar la lescha davart l'organisaziun da la psichiatria. L'ordinaziun è vegnida suttamessa ad ina revisiun parziala ed ha survegnì in nov num da la regenza. 
 

Da vischnancas e da regiuns

• Fideris: La revisiun parziala da la lescha da construcziun, concludida da la vischnanca da Fideris ils 27 d'october 2011, vegn approvada. Il plan da zonas e plan general da furmaziun 1:2000 Arieschbach ch'è vegnì concludì il medem mument vegn approvà cun cundiziuns. Tenor ils plans da la vischnanca duain vegnir construidas en il territori Arieschbach ina plazza da rimnada e da zavrada per rument da construcziun mineral sco er ina plazza da cumpostadi.
• Grono: Il plan da zonas 1:2000 ch'è vegnì concludì da la vischnanca da Grono ils 26 da november 2000 en il rom d'ina revisiun totala da la planisaziun locala vegn approvà concernent l'attribuziun da la parcella nr. 242 a la zona d'industria. La parcella situada en il territori "Pascolet" sa chatta per part en il guaud. Perquai ch'i manca ina permissiun da runcar ha la regenza sistì l'onn 2002 da far la procedura d'approvaziun concernent l'enzonaziun. Il matg da quest onn ha il departament cumpetent da construcziun traffic e selvicultura concedì la permissiun definitiva da runcar per 4500 meters quadrat da guaud.
• Val Stussavgia: Il project "Rempar da lavinas e plantaziun Neukirch nord" da la vischnanca da Val Stussavgia vegn approvà. Als custs vegn garantida ina contribuziun da totalmain 925 650 francs. Il project ha la finamira da proteger la via da la Val Stussavgia. Ils dus laviners tar Neukirch nord respectivamain "Gün" vegnan segirads cun rempars da lavinas temporars e cun emplantaziuns.
• Sour: A la vischnanca da Sour vegn garantida ina contribuziun da maximalmain 192 900 francs a favur da la construcziun nova da la serenera a Sour.

Projects da vias
La regenza ha approvà 1 536 000 francs per lavurs da construcziun sin ils suandants trajects:
- via da la Mantogna dadens: lavurs d'impressari a Masagn, Martinsruh
- via d'Engiadina: lavurs d'impressari per la protecziun cunter crudada da crappa Traversinas, traject Ardez – Scuol 
  

Gremi: regenza
Funtauna: rg chanzlia chantunala dal Grischun