La regenza grischuna vuless domiciliar il center naziunal da sports da naiv previs en il Grischun. Per pudair inoltrar a la confederaziun ina reclama cumpetitiva dal lieu, publitgescha ella il project sin plaun chantunal.

La stad 2012 ha l'uffizi federal da sport UFSPO cumenzà a far ils scleriments preliminars per in studi da realisabladad concernent in center naziunal da sports da naiv. En il rom da questas lavurs èn vegnidas formuladas las finamiras sco er il potenzial dal martgà ed ils basegns da las gruppas en mira. Il center duai porscher premissas optimalas per realisar champs da scola e da sports da naiv, el duai esser in lieu adattà per la scolaziun e per la furmaziun supplementara en ils sports da naiv ed el duai er satisfar als basegns dal sport da prestaziun. Il matg passà èn ils chantuns vegnids envidads d'inoltrar fin la fin da settember 2013 lur candidaturas per eventuals lieus da staziunament.

Sco che la regenza ha constatà gia l'onn 2012 en la resposta ad ina intervenziun en il cussegl grond, beneventa ella las stentas per crear in center naziunal da sports da naiv. Or da plirs puntgs da vista ha il chantun in grond interess da realisar il lieu da staziunament en il Grischun. Il turissem da sports da naiv è ina pitga impurtanta per la rendita da l'economia grischuna e per la promoziun da la generaziun giuvna. Quai è impurtant per la futura prosperitad dal chantun. In center da sports da naiv è perquai er in'occasiun ideala per preschentar a las gruppas d'utilisaziun odiernas e futuras las pussaivladads excellentas da far sports da naiv e da glatsch al lieu.

Per pudair proponer a la confederaziun en la candidatura chantunala il lieu da staziunament il meglier pussaivel, vegn fatga ina publicaziun dal project entaifer il chantun. Vischnancas interessadas han da drizzar fin als 12 da fanadur 2013 ina decleraziun d'intenziun en scrit al departament d'educaziun, cultura e protecziun da l'ambient, Quaderstrasse 17, 7001 Cuira. En questa decleraziun ston ellas formular ina posiziun concisa davart il grad d'adempliment giavischà dals singuls criteris da l'uffizi federal da sport UFSPO. Suenter decida la regenza tge candidatura che vegn cuntinuada. 
 

Remartga:
Ils documents da candidatura dal UFSPO pon vegnir consultads qua. 
 

Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch 
 

Gremi: regenza
Funtauna: rg chanzlia chantunala dal Grischun