La regenza grischuna approvescha in nov concessiunament da l'ovra electrica Tschar en Surselva. Plinavant è la regenza s'occupada cun las petiziuns da la sessiun dals giuvenils dal Grischun. Pussaivladads da finanziar il supplement da notg en il traffic public duain vegnir examinadas. 

Nov concessiunament da l'ovra electrica Tschar
La regenza ha approvà in nov concessiunament anticipà da l'ovra electrica Tschar en Surselva. Las novas concessiuns dal dretg da las auas che las vischnancas da Sursaissa, da Breil e da Vuorz han dà l'onn 2012 al consorzi da studi OE Tschar èn vegnidas approvadas da la regenza. Il consorzi da studi OE Tschar, dal qual fan part l'Axpo Hydro Surselva SA sco er las trais vischnancas da staziunament, planisescha pervia dal nov concessiunament ch'è fixà ad 80 onns d'engrondir ils implants existents sco er da realisar in stgalim d'ovra electrica sura supplementar. La prestaziun installada duai vegnir augmentada dad actualmain 4 a ca. 10 megawatts. I vegn quintà cun ina producziun annuala media da tut l'implant da circa 36 uras da gigawatt. Il consorzi da studi fa quint cun custs d'investiziun en l'autezza da 42 milliuns francs.
L'indemnisaziun per la renunzia al return dals implants importa 8 milliuns francs. Las vischnancas concessiunaras survegnan 4,372 milliuns francs ed il chantun 3,628 milliuns francs. Previsa è ina participaziun d'aczias dal maun public vi da la societad d'ovras electricas che sto anc vegnir fundada (vischnancas concessiunaras 34 pertschient, chantun 15 pertschient). 

Il project da sauaziun en la Tumleastga è realisabel
Per sauar tut il terren agrar en la Tumleastga pon vegnir prendids annualmain 900 000 meters cubic aua da la galaria da pressiun da l'ovra electrica Alvra-Tumleastga (Casti-Giuvaulta) da l'ovra electrica da la citad da Turitg. La regenza ha approvà ils supplements respectivs tar las concessiuns dal dretg da las auas da las vischnancas concessiunaras. Previs èsi da construir ina infrastructura da sauaziun regiunala en la Tumleastga. 

Center da controlla per il traffic pesant a Roveredo: il contract è pront per la suttascripziun
A partir da l'onn 2016 duai il traffic pesant sin la A13 pudair vegnir controllà er a Roveredo. La regenza ha prendì enconuschientscha da las lavurs preparatoricas da la polizia chantunala dal Grischun e da l'uffizi federal da vias (UVIAS). Il contract cun il UVIAS po vegnir suttascrit.
A Roveredo duain vegnir controllads ils camiuns che van sin la A13 vers nord, entant che en il center da controlla a Riòlta sut sin la vart nord dal San Bernardin vegn controllà il traffic pesant en direcziun sid. Il nov center da controlla per il traffic pesant a Roveredo è ina part integrala dal project general per in sviament da Roveredo. La gestiun dal center vegn finanziada cumplainamain da la confederaziun. Latiers tutgan er ils custs da persunal. A Roveredo vegnan stgaffidas 6 novas plazzas da lavur. 

Sessiun da giuvenils: scleriments davart la tariffa da notg en il traffic public
La regenza è sa fatschentada cun las petiziuns ch'èn vegnidas inoltradas da la sessiun dals giuvenils dal Grischun il matg 2013. Las petiziuns deliberadas dals giuvenils han tractà differents temas per concepir la convivenza ed il futur dal Grischun.
En ina petiziun davart il servetsch public vegn la regenza supplitgada da s'engaschar per l'aboliziun da la tariffa da notg en il traffic public dal chantun Grischun. Or dal puntg da vista da la regenza na manass quai betg a la finamira perquai ch'il chantun vuless offrir er en l'avegnir ina purschida da notg attractiva. La regenza è però pronta da laschar calcular ils custs che resultan, sch'il chantun finanziass eventualmain il supplement da notg, sco er da laschar examinar ulteriuras pussaivladads da finanziaziun. Pussaivlas pudessan per exempel esser variantas "finanziadas parzialmain" sco tariffas unitaras analogamain a l'aglomeraziun da Turitg u er in sponsoring dals supplements da notg tras interpresas sco soluziun da gudogn per tuttas duas varts. Las cartas da client da questas interpresas dessan il dretg da viagiar libramain en la rait da notg, quai che pudess la finala er gidar ad augmentar l'attractivitad da las atgnas purschidas da questas interpresas en il segment da marketing che duai svegliar l'interess dals giuvenils. 

Prolungà il project "management da cas furmaziun professiunala"
La regenza ha prolungà in project per sustegnair giuvenils che han difficultads da s'integrar en il martgà professiunal ed en il martgà da lavur, per entant fin la fin da l'onn 2015. Il project "management da cas furmaziun professiunala" ha cumenzà la fin da l'onn 2010. Ils onns 2011 e 2012 han pudì vegnir elavuradas en collavuraziun cun ils giuvenils pertutgads e cun las persunas giuvnas creschidas involvidas 106 soluziuns (contract d'emprendissadi sin il stgalim secundar II) u soluziuns intermediaras (soluziun transitorica u praticum). Il project vegn sustegnì finanzialmain da la confederaziun. 

Concludida ina nova ordinaziun davart ils stipendis
L'ordinaziun tar la lescha davart las contribuziuns da scolaziun (ordinaziun da stipendis) è vegnida adattada da la regenza. Tranter auter èn vegnids surpigliads ils criteris fixads da la regenza per il dretg da survegnir ina contribuziun sch'ins frequenta ina scola media a l'exteriur. La durada minimala d'in curs da lingua cun dretg da stipendis è vegnida reducida da 26 a 16 emnas. Las limitas maximalas per las entradas e per la facultad dals geniturs che vegnan resguardadas en cas da dumondas da credit per studentas e students èn vegnidas adattadas vers ensi. L'ordinaziun da stipendis revedida parzialmain entra en vigur per il cumenzament da l'onn da scola 2013/2014. 

Procedura da multas disciplinaras er tar cuntravenziuns cunter la lescha davart las persunas estras
La lescha federala davart las multas disciplinaras vegn applitgada per sancziunar pitschens surpassaments da la lescha federala davart il traffic sin via. Cun ina revisiun totala duai il champ d'influenza da la lescha federala davart las multas disciplinaras ussa vegnir engrondì. La procedura da multas disciplinaras duai vegnir extendida sin nov ulteriuras leschas federalas. Sco che la regenza dal Grischun scriva en ina posiziun a la confederaziun avess questa pussaivladad a ses avis da princip dad esser applitgabla per tut las leschas federalas. D'ina gronda impurtanza pratica fissi en mintga cas da pudair sancziunar surpassaments da la lescha federala davart las persunas estras cun ina multa disciplinara. Da quai resultass ina distgargia remartgabla per las autoritads da persecuziun penala. 


Da vischnancas e da regiuns

• Zuoz: Il project "Siglientada da lavinas" da la vischnanca da Zuoz vegn approvà. Als custs vegn garantida ina contribuziun da maximalmain 1,12 milliuns francs. La finamira dal project è quella da garantir la protecziun dal territori d'abitadi da Zuoz cun metodas da siglientar lavinas confurmas al temp. Perquai vegnan construidas en l'intschess da la Val Buera quatter pitgas per siglientar lavinas ed en l'intschess vischin da la Val d'Urezza tschintg pitgas per siglientar lavinas.

Projects da vias
La regenza ha approvà 1 267 000 francs per lavurs da construcziun sin il suandant traject:
- via dal Bernina: lavurs d'impressari per la protecziun cunter crudada da crappa en connex cun la correcziun da la via, traject dal Lai da Puschlav.

Plinavant ha la regenza approvà il project d'exposiziun per la correcziun da la via da Ftan, traject Pra da Punt – Saduas. Il project cumpiglia la renovaziun, il schlargiament ed il rinforzament da la via. Uschia vegn augmentada la segirezza dal traffic da la via da colliaziun tranter Ardez e Ftan. 


Gremi: regenza
Funtauna: rg chanzlia chantunala dal Grischun