Il chantun Grischun desista da duvrar il dretg da precumpra ch'è vegnì fixà ils 12 da december 2012 en il contract da locaziun per l'hotel Rustico a Laax. L'immobiglia duai vegnir duvrada sco center collectiv per requirentas e requirents d'asil en il senn dal concept chantunal da collocaziun e sin basa da la relaziun da locaziun existenta.

Ina gruppa d'investiders indigens, che vuless cumprar l'hotel Rustico cun agid da la vischnanca da Laax e far or da quel in hotel garni, ha fatg cun ils proprietaris actuals da l'immobiglia in contract da dretg da cumpra. Tenor quel surpiglia la gruppa tut las obligaziuns che resultan dal contract da locaziun. Latiers tutgan er il dretg da precumpra dal chantun per il pretsch da la meglra offerta (dretg da precumpra illimità) sco er l'obligaziun da surpigliar il contract da locaziun cun tut ils dretgs e cun tut las obligaziuns en cas d'ina vendita. La regenza desista da duvrar il dretg da precumpra fixà en il contract da locaziun. Ina cumpra na s'accordass betg cun il concept "Acquist e substituziun da novs alloschis per persunas dal sectur d'asil en il chantun Grischun" approvà l'october 2009 che prevesa ina relaziun equilibrada tranter centers collectivs che appartegnan al chantun e ch'èn duvrabels permanentamain e tals prendids en locaziun che stattan a disposiziun en moda flexibla. La regenza spera che la nova structuraziun dals fatgs d'asil en Svizra distgargia ils chantuns a lunga vista e che main persunas vegnian attribuidas al Grischun. Fin che las mesiras planisadas mussan in effect vegni a durar anc in pèr onns. Per quests motivs vegn dada la preferenza a la locaziun envers la cumpra da l'immobiglia.

Tenor la disposiziun da la vischnanca da Laax dals 24 d'avrigl 2013 ha il chantun stuì inoltrar ina dumonda da construcziun per pudair midar l'utilisaziun da l'anteriur hotel ad in alloschi d'asil. Quella dumonda n'è actualmain anc betg respundida. La procedura è vegnida sistida supplementarmain pervia d'ina zona da planisaziun che la vischnanca ha disponì ils 13 da zercladur 2013. Cunter questa zona da planisaziun ha il chantun fatg in recurs da planisaziun tar la dretgira administrativa. Da prender en funcziun il center da transit sco previs sin il cumenzament da fanadur 2013 n'è betg stà pussaivel, malgrà che l'object da locaziun è vegnì surdà en il fratemp. Il center vegn avert pir, cur che las permissiuns correspundentas èn avant maun. 

Soluziun transitorica
Per cumpensar las plazzas da collocaziun che mancan actualmain en il sectur d'asil ha il chantun pudì prolungar provisoricamain per in pèr mais la relaziun da locaziun per il center da transit Schiabach en la vischnanca da Tavau. Uschia pon las persunas attribuidas da la confederaziun al chantun vegnir collocadas provisoricamain vinavant tenor il concept da collocaziun approvà da la regenza l'onn 2009 exclusivamain en centers d'asil chantunals, quai che distgargia correspundentamain las vischnancas. L'uffizi da migraziun e da dretg civil cumpetent vegn ad attribuir al center da transit Schiabach persunas dal sectur d'asil, sche quai è necessari pervia da l'occupaziun dals auters centers chantunals. En il center Schiabach metta il chantun a disposiziun a la vischnanca da Tavau plazzas per collocar fugitivas e fugitivs renconuschids, per ils quals la vischnanca è responsabla. Questa soluziun è il resultat d'ina collavuraziun cooperativa e colleghiala da blers onns tranter il chantun e la vischnanca da Tavau per collocar requirentas e requirents d'asil e da persunas admessas provisoricamain. 
 

Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
- mastral Tarzisius Caviezel, vischnanca da Tavau, tel. 081 414 30 11, e-mail tarzisius.caviezel@davos.gr.ch  
 

Gremi: regenza
Funtauna: rg chanzlia chantunala dal Grischun