En sia ultima sesida ha la regenza grischuna approvà las basas contractualas per segirar ed organisar da nov la plazza aviatica regiunala a Samedan. Plinavant ha ella approvà la revisiun parziala da l'ordinaziun davart il gimnasi. Uschia duai ina maturitad bilingua vegnir purschida da nov er cun englais. 
 
Approvà las basas contractualas da la plazza aviatica regiunala a Samedan
La regenza grischuna approvescha las basas contractualas per segirar ed organisar da nov la plazza aviatica regiunala a Samedan. En detagl sa tracti dal contract d'annullaziun e da barat tranter il chantun Grischun e l'Engadin Airport SA, da la cunvegna da princip tranter il chantun Grischun e l'interpresa d'infrastructura dal circul d'Engiadin'ota (INFRA) sco er da la constituziun da dretgs da construcziun independents e permanents tranter il chantun Grischun e la INFRA. Plinavant è vegnida approvada la cunvegna da prestaziun tranter la INFRA e l'Engadin Airport SA. Tenor il concept da basa deliberà duain ils indrizs d'infrastructura da la plazza aviatica regiunala vegnir separads en l'avegnir organisatoricamain e giuridicamain da la gestiunaria actuala da la plazza aviatica. La structura da mira prevesa d'ina vart la INFRA sco interpresa independenta da dretg public e da l'autra vart ina societad da gestiun privata. L'infrastructura e la proprietad funsila restan pia cumplainamain en la proprietad dal maun public resp. vegnan transferidas al maun public e vegnan correspundentamain er finanziadas dal maun public. 

Maturitad bilingua da nov er cun englais
La revisiun parziala da l'ordinaziun davart il gimnasi vegn relaschada da la regenza grischuna. Las adattaziuns da l'ordinaziun davart il gimnasi èn necessarias, perquai che la cumissiun svizra da maturitad ha augmentà las pretensiuns per la renconuschientscha da maturitads bilinguas al gimnasi. Durant la scolaziun gimnasiala da 4 onns na ston da nov betg pli vegnir absolvidas mo 600, mabain almain 800 lecziuns en ina segunda lingua. Fin ussa pudevan vegnir fatgas en il Grischun maturitads bilinguas en las linguas chantunalas. Da nov duain tut las scolas medias grischunas survegnir la pussaivladad da porscher ina maturitad bilingua er cun englais. Scolas medias che na porschan betg ina maturitad bilingua pon instruir singuls roms en moda immersiva en las linguas chantunalas u en englais. 
 

Da vischnancas e da regiuns

• Sevgein: La revisiun parziala da la planisaziun locala (explotaziun da gera a Tschentaneras), concludida da la vischnanca da Sevgein ils 30 da matg 2012, vegn approvada.
• Vaz sut: Il plan da zonas e plan general da furmaziun 1:2000 "Vitg", che la vischnanca da Vaz sut ha concludì ils 15 da december 2010, vegn ussa approvà er areguard l'enzonaziun da la part vest da la parcella nr. 749.
• Tarasp: Il project "Avertura da Chant dal Cuosp – Alp Laisch e deposit da laina Sgnè" da la vischnanca da Tarasp vegn approvà. Als custs subvenziunabels vegn garantida ina contribuziun chantunala da maximalmain 654 810 francs.
• Donat e Ziràn-Reschen: Per il project "Lavuratori a Donat" da las vischnancas da Donat e da Ziràn-Reschen vegn garantida ina contribuziun da maximalmain 748 000 francs als custs subvenziunabels.
• Landquart: La renovaziun dals binaris da colliaziun da la vischnanca da Landquart vegn renconuschida sco mesira subvenziunabla. I vegn garantida ina contribuziun chantunala da maximalmain 196 926 francs. La contribuziun vegn pajada mo, sche la realisaziun architectonica dal project è terminada fin la fin da l'onn 2016.
• Cazas: Per renovar ed engrondir il provediment d'aua Preaz, etappas 2013 e 2014, vegn garantida a la vischnanca da Cazas ina contribuziun da maximalmain 72 900 francs als custs subvenziunabels.
• Regiun Surselva: L'adattaziun dal plan directiv regiunal areguard ils concepts "Explotaziun da material e recicladi da ruments", che la corporaziun regiunala Surselva ha concludì ils 26 da mars 2013, vegn approvada.

Contribuziuns chantunalas a differentas instituziuns 

• Fundaziun Hosang Plankis: La versiun repassada da la dumonda da subvenziun da la fundaziun Hosang Plankis per construir in nov uigl da chauras ed ina chascharia per il bain puril vegn approvada e sustegnida cun ina contribuziun chantunala da maximalmain 115 270 francs.
• Tgira da monuments: Il chantun sa participescha cun 32 500 francs a la restauraziun parziala da l'intern da la baselgia evangelica-refurmada ad Ardez.

Projects da vias
La regenza ha approvà 5 201 000 francs per lavurs da construcziun sin ils suandants trajects:
- via dal Bernina: lavurs da cuvrida, Puschlav, entaifer il vitg
- via sursilvana: lavurs d'impressari en connex cun l'access a la via da la Lumnezia – Runcaleida
- via sursilvana: lavurs d'impressari en connex cun la correcziun da la via a Lumneins
- via sursilvana da la vart dretga dal Rain: renovaziun dal traject Carpäll – Rütland
- via da Seewis: sanaziun da la via incl. allontanament da l'aua e conducts d'ovra, Seewis, spartavias chasa da giuvenils – Motschna 
 

Gremi: regenza
Funtauna: rg chanzlia chantunala dal Grischun