Il departament da giustia, segirezza e sanadad dal chantun Grischun ha tschernì Jürg Räber da 56 onns per il 1. da fanadur 2013 sco directur dal stabiliment per l'execuziun giudiziala Realta. Räber daventa successur dad Andrea Zinsli che vegn – sco substitut dal manader da l'uffizi – a tgirar ed a realisar en il futur en spezial ils proxims projects empermettents per il svilup da l'execuziun da chastis en il Grischun.

Jürg Räber ha lavurà ils ultims quatter onns sco manader da l'execuziun e sco vicedirectur en il stabiliment per l'execuziun giudiziala Realta. Il stabiliment per l'execuziun giudiziala Realta a Cazas exequescha chastis d'empraschunament en moda averta cun la finamira da realisar mesiras da segirezza e da preparar ils collocads ad ina reintegraziun sociala e professiunala en la societad. Per garantir la spedida da burgaisas e burgais esters che n'han nagin dretg da dimora en Svizra maina il stabiliment per l'execuziun giudiziala Realta ultra da quai in arrest administrativ tenor il dretg da persunas estras.
Jürg Räber ha experientschas variadas sco manader operativ e sco commember d'organs strategics en l'economia privata. Ultra da quai è el s'engaschà blers onns en posiziuns directivas per organisaziuns senza profit en il sectur social e da la sanadad.
Questa successiun è daventada necessaria perquai che lic. iur. Mathias Fässleren è daventà il nov manader da l'uffizi per l'execuziun giudiziala dal Grischun. 
 

Infurmaziuns:
Mathias Fässler, manader da l'uffizi per l'execuziun giudiziala, tel. 081 257 52 51, e-mail Mathias.Faessler@ajv.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad