Al dretg mument per l'onn da scola nov 2013/14 cumpara il nov med d'instrucziun da lingua en rumantsch grischun per la 7. classa. Il med d'instrucziun "Vi e nà" cumpiglia in cudesch per scolaras e per scolars, carnets da lavur, commentaris per la magistraglia, dus discs cumpacts accumpagnants sco er ina plattafurma digitala.

Ils singuls chapitels dal cudesch tractan ils suandants temas dal mund da las scolaras e dals scolars: "Vi e nà" – sa sentir tratg vi e nà tranter differents munds e sa stuair decider per quai ch'è gist per mintgina e per mintgin, "Vias a las linguas" – emprender l'impurtanza da la(s) lingua(s), "Rendezvous cun il futur" – perscrutar ils agens interess e las atgnas fermezzas, per ristgar da far in emprim pass en la direcziun da chattar la dretga professiun. Ils carnets da lavur porschan exercizis interessants e variads e materialias supplementaras per emprender en moda individuala. En mintga chapitel èn integrads dus tests formativs che servan a las scolaras ed als scolars per controllar las finamiras d'emprender.

Il quart chapitel "Ivettas rumantschas" permetta a las scolaras ed als scolars da prender invista da la litteratura e da la cultura rumantscha. Sin fundament d'extracts d'ovras classicas da las differentas regiuns e dals differents idioms è vegnida elavurada mintgamai ina retscha da lecziuns che metta la tematica, il messadi e l'ovra en connex cun il mund da las scolaras e dals scolars e che duai uschia entusiasmar las scolaras ed ils scolars per l'occupaziun cun la litteratura e cun la cultura rumantscha. Sco tschintgavla part dal cudesch suonda ina sinopsa da la grammatica che dat ina survista dals cuntegns che las scolaras ed ils scolars han gia emprendì en scola primara e che als serva er sco ovra da consultaziun.

La grafica fitg plaschaivla augmenta plinavant la qualitad e l'attractivitad dal med d'instrucziun. Il layout e las illustraziuns èn adattads a la vegliadetgna da las scolaras e dals scolars dal stgalim superiur. Els accumpognan ils cuntegns didactics adina cun premura, permettan dentant – en lur moda reducida ed abstracta – a l'observatur da laschar lavurar sia atgna fantasia. En quai che reguarda la didactica e la metodica resguarda il med d'instrucziun differents nivels, diversas abilitads e differents tips d'emprender. Il med d'instrucziun cuntegna ultra da quai blers gieus educativs da differentas furmas e cun differentas finamiras, dentant adina cun l'intent d'entusiasmar las scolaras ed ils scolars da s'occupar cun lur lingua. Il commentari per las persunas d'instrucziun è pia er formulà sapientivamain en moda fitg cumplessiva. El gida cun pled e fatg las persunas d'instrucziun a planisar l'instrucziun. Tant las ordinaziuns concretas davart l'instrucziun, tut las soluziuns, ils models, ils tests sco er las ideas ed ils impuls tematics supplementars ch'el dat permettan a las persunas d'instrucziun da preparar e da realisar ina instrucziun interessanta e variada. 

Emprender e sa furmar supplementarmain en moda digitala
Ultra dal cudesch per scolaras e per scolars, dals carnets da lavur, dal commentari per las persunas d'instrucziun e dals discs cumpacts accumpagnants porschan ils meds d'instrucziun a partir da la 5. classa primara supplementarmain plattafurmas digitalas cun exercizis davart ils singuls chapitels dal cudesch che pon vegnir duvrads tant durant l'instrucziun en scola sco er per l'individualisaziun entaifer la classa. Francads concernent il cuntegn, concepids en ina moda plaschaivla ed en in vestgi grafic attractiv permettan ils exercizis a las scolaras ed als scolars d'approfundar ils cuntegns, saja quai ord vista tematica, grammaticala sco er lexicala. Ultra da quai metta la plattafurma digitala da la 7. classa a disposiziun ulteriur material illustrativ e preschenta parallelamain al cudesch per scolaras e per scolars la sinopsa grammaticala cun la quala las scolaras ed ils scolars pon reactivar ils cuntegns ch'els han gia emprendì. Las plattafurmas digitalas èn ultra da quai accessiblas a la publicitad (cun il browser da Mozilla Firefox), las plattafurmas da la 5. e da la 6. classa primara (www.splerins.ch, www.sgurdins.ch) pon vegnir utilisadas gia dapi dus onns, la plattafurma digitala dal med d'instrucziun actual (www.viena.ch) stat a disposiziun a partir da l'onn da scola 2013/14. 
 

Persuna da contact:
Ivo Berther, manader dal project "RG en scola", uffizi da cultura, tel. 081 257 48 06, e-mail: ivo.berther@afk.gr.ch 
 

Gremi: uffizi per la scola populara ed il sport
Funtauna: rg uffizi per la scola populara ed il sport