Cun Ilanz/Glion duai vegnir stgaffida per l'onn 2014 la sisavel gronda vischnanca dal chantun Grischun. La regenza preschenta la missiva davart la fusiun da las vischnancas da Castrisch, Duin, Glion, Ladir, Luven, Pigniu, Pitasch, Riein, Rueun, Ruschein, Schnaus, Sevgein e Siat al cussegl grond.

Ils 16 da november 2012 èn las votantas ed il votants da las 13 vischnancas da Castrisch, Duin, Glion, Ladir, Luven, Pigniu, Pitasch, Riein, Rueun, Ruschein, Schnaus, Sevgein e Siat s'exprimids per ina fusiun a la nova vischnanca dad Ilanz/Glion. Il contract da fusiun concludì furma la basa per la nova vischnanca che cumpiglia in territori da 13 343 hectaras e 4600 abitantas ed abitants (stadi da la fin da l'onn 2011).

Ilanz/Glion, da nov la sisavel gronda vischnanca dal Grischun, vegn ad avair in ferm center economic. La citad da Glion è gia oz in center impurtant da scola, da sanadad, da traffic e d'economia da la regiun Surselva. Ils conturns èn caracterisads da l'agricultura. En la gronda part da las 13 vischnancas ch'èn cumpigliadas da la fusiun è l'agricultura ina pitga impurtanta. Las vischnancas enturn Glion collavuran gia oz en moda fitg intensiva. Sin il champ cultural, sportiv e social existan dapi ditg stretgs e numerus lioms.

En il contract da fusiun è vegnì fixà tranter auter: La nova vischnanca dad Ilanz/Glion vegn a cumenzar cun in parlament communal. Mintga vischnanca actuala vegn ad esser represchentada en quel cun almain ina commembra u in commember. Las linguas uffizialas dad Ilanz/Glion èn sursilvan e tudestg. La nova vischnanca e sia scola s'engaschan per in concept raschunaivel da lieus decentrals e promovan il mantegniment dal rumantsch. Las scolas da fin ussa restan en lur lieus.

Per la regenza grischuna correspunda il project da fusiun Ilanz/Glion en moda ideala a la refurma currenta da las structuras territorialas en il Grischun. La fusiun vegn sustegnida dal chantun cun totalmain 17,7 milliuns francs. Ultra da quai vegnan garantidas differentas prestaziuns spezialas. Premess che la fusiun vegnia approvada dal cussegl grond en la sessiun d'october 2013, po ella entrar en vigur per il 1. da schaner 2014. A partir dal 2014 vegn il chantun Grischun alura ad avair anc 146 vischnancas (oz: 158). 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  


Gremi: regenza
Funtauna: rg chanzlia chantunala dal Grischun