A chaschun da sia sesida dals 27 d'avust 2013 ha la regenza dal chantun Grischun prendì enconuschientscha dal rapport dal cumissari da la regenza davart la vischnanca da S. Martin ed ha concludì in'ulteriura mesira da surveglianza. 

La regenza ha constatà che la vischnanca da S. Martin n'è betg abla da funcziunar sut las relaziuns actualas. Perquai ha ella concludì d'engaschar per la vischnanca in cumissari da la regenza cun cumpetenzas extendidas. Il cumissari da la regenza survegn cumpetenzas da controlla, da decisiun e d'approvaziun. La funcziun da cumissari da la regenza surpiglia er vinavant Thomas Nievergelt. El enconuscha las relaziuns localas grazia a ses mandat per sclerir las renfatschas da vart da la cumissiun da gestiun (CdG).

En il rom d'in recurs da surveglianza ha la suprastanza da la vischnanca da S. Martin supplitgà da sia vart la regenza da sclerir il suspect da la violaziun dal secret d'uffizi tras commembers da la CdG. I sa tracta qua d'infurmaziuns ch'èn vegnidas enconuschentas a las medias. Quest recurs da surveglianza vegn tractà da la regenza en ina procedura separada. Separadamain sto er vegnir sclerida la dumonda, sch'ils fatgs constatads han ina relevanza penala e ston perquai vegnir denunziads. Il cumissari da la regenza vegn a render enconuschent ils detagls dal cuntegn dal rapport a la radunanza communala da S. Martin.

La mesira dura fin ils 30 d'avrigl 2014, pia fin a la fin da la perioda d'uffizi currenta da las autoritads. Il rapport dal cumissari da la regenza ha mussà ch'i dovra er ina midada structurala per schliar la crisa instituziunala, e la regenza intimescha explicitamain la vischnanca d'examinar ina tala. En il center da sias ponderaziuns metta la regenza en quest connex ils scleriments da fusiun cun la vischnanca vischina da Val S. Pieder (cf. Territori da promoziun Val S. Pieder en: carnet nr. 8/2010-2011, 10. rapport e missiva tar la refurma communala e territoriala, p. 645). Er la CdG ha gia pretendì scleriments correspundents.

Ils custs da la mesira da surveglianza ston vegnir surpigliads da la vischnanca da S. Martin. 
 

Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch
- Georg Aliesch, manader da la partiziun "surveglianza da las vischnancas", uffizi da vischnancas, tel. 081 257 32 20, e-mail: georg.aliesch@afg.gr.ch


Gremi: regenza
Funtauna: rg chanzlia chantunala dal Grischun