La regenza grischuna ha approvà in project da construcziun per sanar il center per pedagogia speziala a Giuvaulta. Ultra da quai è la regenza s'occupada da differentas fatschentas da vischnancas e da regiuns. 

Contribuziun a la renovaziun dal center per pedagogia speziala a Giuvaulta
Il center per pedagogia speziala a Giuvaulta è in center da cumpetenza per uffants e per persunas creschidas cun impediments. En las gruppas d'abitar da la fundaziun Giuvaulta vivan actualmain 35 persunas. La regenza ha approvà in project per sanar l'edifizi principal, las localitads da las gruppas d'abitar e la chasa dals manaders da la fundaziun Giuvaulta e garantì ina contribuziun da construcziun da maximalmain 5,84 milliuns francs, cun resalva da l'approvaziun d'in credit posteriur correspundent tras la cumissiun da gestiun dal cussegl grond. Il credit vegn concedì sin fundament da la lescha da scola e da la lescha d'integraziun da persunas cun impediments. Ils custs imputabels da quest project importan 7,3 milliuns francs. La finanziaziun restanta da la renovaziun sto vegnir garantida da la fundaziun Giuvaulta.
Il project da construcziun cuntegna la sanaziun termica dals mirs exteriurs da l'edifizi principal, da las trais chasas da las gruppas d'abitar e da la chasa dals manaders. Plinavant vegnan renovads cumplettamain ed adattads a las pretensiuns modernas ils indrizs sanitars en tut ils locals da las gruppas d'abitar. Ultra da quai vegnan remplazzadas tut las cuschinas da las gruppas d'abitar. En tut ils tracts vegn renovà l'interiur. Ils indrizs da la tecnica da chasa vegnan sanads. Differents locals vegnan ultra da quai tratgs a niz per auters intents, e quai per motivs da manaschi. 
 

Da vischnancas e da regiuns

• Domat: La revisiun parziala da la planisaziun locala ch'è vegnida concludida da la vischnanca da Domat ils 17 da zercladur 2012 vegn ussa er approvada areguard ils meds da planisaziun. L'approvaziun era vegnida sistida provisoricamain l'avrigl 2013 perquai ch'i mancavan las permissiuns da runcar. Las permissiuns da runcar "Vial" e "Crest'Aulta" vegnan dadas cun cundiziuns e cun resalvas. La runcada "Crest'Aulta" serva ad in nov access principal per il traffic pesant a l'areal da la Ems Chemie SA ed a la Axpo Tegra SA. Per evitar temps da spetga e bloccadas a la barriera da la viafier duai vegnir construì in sutpassadi sut ils binaris da la Viafier retica or e duai vegnir avert l'areal industrial da nov nà da l'ost.
• Arosa: La revisiun parziala da la planisaziun locala, concludida da la vischnanca da St. Peter-Pagig (dapi il 1. da schaner 2013 vischnanca d'Arosa) ils 19 da december 2012, vegn approvada. La revisiun cuntegna l'engrondiment da la zona per l'explotaziun da material "Val Mischain".
• Filisur: La revisiun parziala da la lescha davart las taxas da cura e davart la contribuziun per promover il turissem da la vischnanca da Filisur dals 11 d'avrigl 2013 vegn approvada cun excepziun da la disposiziun davart la commembranza automatica a l'uniun Bravuogn Filisur turissem.
• Bever, Bregaglia, Jenins, Lostallo e Scuol: La regenza ha approvà revisiuns da las leschas da taglia da las vischnancas da Bever, Bregaglia, Jenins, Lostallo e Scuol. Las revisiuns pertutgavan tuttas disposiziuns davart il subject da taglia da la taglia sin la part d'ierta e sin donaziuns. 
   

Gremi: regenza
Funtauna: rg chanzlia chantunala dal Grischun