La regenza grischuna sclerescha la finanziaziun tenor prestaziun dals ospitals. Uschia ha ella fixà las tariffas da basa che vegnan duvradas per facturar las prestaziuns d'ospital staziunaras. Questa mesira è daventada necessaria, perquai ch'ils partenaris da tariffa n'èn betg stads buns da sa cunvegnir.

La regenza ha fixà las ratas da basa ch'ils ospitals acutsomatics en il chantun survegnan 9754 francs per tractar pazientas e pazients staziunars da l'assicuranza obligatorica per la tgira da persunas malsaunas, e quai retroactivamain a partir dal 1. da schaner 2012. Per prestaziuns da l'ospital chantunal dal Grischun en il sectur da la medischina fermamain spezialisada ha la regenza fixà ina rata da basa dad 11 300 francs. La rata da basa cuntegna er l'indemnisaziun dals custs per il diever dal stabiliment.
La rata da basa (pretsch da basa) è quel import che sto vegnir pajà proporziunalmain da las assicuranzas da malsauns e dal chantun per in tractament staziunar cun ina grevezza da custs dad 1.0. La grevezza da custs descriva quant auts ch'ils custs medis per il tractament da pazientas e pazients d'ina tscherta gruppa da cas èn. Tractaments simpels han ina grevezza da custs pli bassa, tractaments pli cumplexs ina pli auta. L'import che sto vegnir pajà per in cas da tractament concret vegn eruì en moda che la grevezza da custs ch'è attribuida al cas da tractament concret vegn multiplitgada cun la rata da basa.
L'uschenumnà sistem da pauschala pro cas che vegn applitgà dapi l'onn 2012 funcziuna tenor il princip che per la medema prestaziun vegn pajada la medema indemnisaziun. Quai chaschuna ch'il medem pretsch fundamental furma la basa per calcular las pauschalas pro cas dals singuls ospitals. 

Exceptads èn ils contracts tariffars ch'èn vegnids approvads
La fixaziun da las ratas da basa per ils ospitals acutsomatics en il chantun tras la regenza è daventada necessaria, perquai che las negoziaziuns tranter ils ospitals e las assicuranzas da malsauns han fatg naufragi, danor las excepziuns qua sutvart. Las ratas da basa che la regenza ha fixà na vegnan betg applitgadas là, nua ch'i dat contracts tariffars approvads da la regenza tranter ils ospitals e las assicuranzas da malsauns. Fin ussa ha la regenza approvà ils suandants contracts tariffars:
- contracts tariffars tranter tarifsuisse e l'ospital regiunal dal Partenz, Schiers, sco er l'ospital regiunal da la Surselva, Glion, per ils onns 2012 fin 2014;
- contracts tariffars per l'onn 2012 tranter la federaziun grischuna "chasas ed ospitals" e la Helsana, la KPT e la Sanitas per ils suandants ospitals: ospital chantunal dal Grischun, ospital da Tavau, ospital da l'Engiadin'ota, ospital regiunal dal Partenz, ospital regiunal da la Surselva, ospital San Sisto, ospital da la Bregaglia, ospital Val Müstair, ospital cirquital dal Surses e clinica autalpina da Tavau.

Cunter il fatg che la regenza fixescha las ratas da basa èn ils ospitals e las assicuranzas da malsauns libers da far recurs al tribunal administrativ federal. Fin ch'il conclus da fixaziun da la regenza entra en vigur respectivamain fin ch'ils recurs ch'èn eventualmain vegnids inoltrads cunter il conclus da la regenza èn liquidads cun vigur legala ston ils ospitals facturar proporziunalmain a las assicuranzas da malsauns ed al chantun vinavant las ratas da basa provisoricas che la regenza aveva fixà il cumenzament da l'onn 2012. Exceptads èn er qua quels cas, nua ch'i dat contracts tariffars approvads. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch 
 

Gremi: regenza
Funtauna: rg chanzlia chantunala dal Grischun