Il chantun Grischun inoltrescha a la confederaziun trais annunzias per la realisaziun d'in center naziunal da sports da naiv. Tenor l'avis da la regenza ha in "ticket da trais" cun Tavau, Engiadina/S-chanf e Planeiras las schanzas las pli grondas da reussir per il Grischun.
La regenza sustegna las annunzias da Tavau, d'Engiadina/S-chanf e da Planeiras per realisar in center naziunal da sports da naiv. La fin da settember 2013 vegn il chantun Grischun ad inoltrar ils trais dossiers sco annunzias uffizialas dal Grischun a l'uffizi federal da sport. En ina concurrenza chantunala cun oriundamain sis annunzias han ils projects da Tavau, d'Engiadina/S-chanf e da Planeiras ademplì il meglier las prescripziuns pretensiusas da la confederaziun. Ils trais projects han survegnì ina valitaziun generala quasi identica malgrà differentas fermezzas. Las schanzas per realisar in center naziunal da sports da naiv en il Grischun vegnan ord vista da la regenza mantegnidas il meglier cun inoltrar tut ils trais dossiers d'annunzia. I vegn quintà cun la decisiun dal departament federal da defensiun, protecziun da la populaziun e sport (DDPS) la fin da november 2013.
Sche la recumandaziun dal DDPS resguarda in'annunzia dal Grischun, garantescha la regenza ina contribuziun chantunala da 25 pertschient, dentant maximalmain 10 milliuns francs, dals custs d'investiziun imputabels. Pervia da la gronda impurtanza che vegn attribuida a la realisaziun d'in center naziunal da sports da naiv en il Grischun, è giustifitgà in engaschament finanzial dal chantun en questa dimensiun. Sco imputabels valan quels custs che resultan specificamain per construir e per renovar l'infrastructura centrala sco alloschis e halla da sport. Resalvada resta la garanzia definitiva da la regenza da conceder contribuziuns e la concessiun dal credit tras il cussegl grond u tras sia cumissiun da gestiun.
In center multifar per promover il sport ed ils giuvenils
Cun il project "Center naziunal da sports da naiv" ha la confederaziun pliras finamiras. D'ina vart duain vegnir stgaffidas premissas optimalas per las scolas per organisar champs da sport d'enviern favuraivels. Da l'autra vart duain vegnir realisads curs da scolaziun e da perfecziunament en il sectur dals sports d'enviern. E la finala duai il center naziunal da sports da naiv er servir al sport da prestaziun. Il center na duai betg vegnir manà mo durant l'enviern, mabain restar avert durant l'entir onn.
Per differents motivs ha il chantun Grischun in grond interess ch'il center da sports da naiv vegnia realisà en in lieu en il Grischun. Latiers tutgan ils impuls che la realisaziun dat al turissem ed a l'economia en la regiun correspundenta sco er las pussaivladads supplementaras da la promoziun dal sport, da las qualas profitan er ils uffants e giuvenils dal Grischun. Ils projects vegnan sustegnids d'ina vasta basa politica. Ina incumbensa correspundenta a la regenza grischuna era vegnida inoltrada dal cussegl grond unanimamain il december 2012.
Infurmaziuns:
- Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail:
martin.jaeger@ekud.gr.ch
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail:
andrea.stadler@ekud.gr.ch
Gremi: regenza
Funtauna: rg chanzlia chantunala dal Grischun