Sin basa dals scleriments che la cumissiun da gestiun dal cussegl grond (CdG) ha fatg davart la rolla da las instanzas chantunalas en connex cun la vendita da la Therme a Val S. Pieder vegn ella a la conclusiun che quellas sajan sa cumportadas correctamain ed hajan agì en il rom da lur cumpetenzas.

En connex cun la vendita da la Therme a Val S. Pieder (da quel temp Hoteba SA) tras la vischnanca da Val S. Pieder èn resultadas dumondas davart la rolla da las instanzas chantunalas. En il rom da sia incumbensa sco instanza per controllar l'administraziun ha la CdG decidì da far scleriments en chaussa. En quest connex è ella vegnida sustegnida decisivamain da la controlla chantunala da finanzas.

Cun far ses scleriments è la CdG sa restrenschida a la rolla da las instanzas chantunalas en connex cun la vendita da la Therme a Val S. Pieder. Per quest intent ha ella fatg consegnar ed ha controllà las actas chantunalas. La CdG ha er dumandà tant las autoritads communalas actualas da Val S. Pieder sco er las autoritads ch'eran cumpetentas quella giada, sch'ellas mettessan a disposiziun a la CdG documents che permettan da trair conclusiuns davart il cumportament da las instanzas chantunalas en connex cun la vendita da la Therme a Val S. Pieder. Questas examinaziuns n'han purtà nagins resultats che avessan pretendì ulteriurs pass da vart da la CdG.

Sin basa dals scleriments ch'èn vegnids fatgs e sin fundament dals documents avant maun vegn la CdG a la conclusiun che las instanzas chantunalas sajan sa cumportadas correctamain ed hajan agì en il rom da lur cumpetenzas. 
 

Infurmaziuns:
Cristiano Pedrini, president da la cumissiun da gestiun,  tel. 079 249 52 65 
 

Gremi: cumissiun da gestiun
Funtauna: rg cumissiun da gestiun