En in studi davart il provediment cun ospitals ha la firma Polynomics SA, Olten, fatg ina cumparegliaziun cumplessiva da las regulaziuns chantunalas dals ospitals e guardà, quant enavant ch'ellas observan ils princips da concurrenza. En quest studi cun il titel "Die Spitalversorgung im Spannungsfeld der kantonalen Spitalpolitik", ch'è vegnì fatg per incumbensa da comparis.ch, ha il chantun Grischun cuntanschì il terz rang.

Il studi publitgà dacurt da l'interpresa da cussegliaziun Polynomics dad Olten attesta ch'il provediment cun ospitals dal chantun Grischun observa fitg bain ils princips da concurrenza. Positivamain valitescha il studi en spezial ch'il chantun Grischun na posseda pli nagins agens ospitals, che las contribuziuns als ospitals per prestaziuns d'utilitad publica vegnan preschentadas en moda transparenta e detagliada e ch'ils ospitals ston render quint tenor Swiss GAAP RRQ. Suttastritgà vegn er il fatg che la legislaziun davart la planisaziun e la finanziaziun dals ospitals è fitg transparenta cumpareglià cun il rest da la Svizra. La legislaziun executiva detagliada davart la planisaziun dals ospitals, ch'è entrada en vigur il 1. da schaner 2013, n'è betg anc vegnida resguardada en il rom da quest giudicament.
Il studi, che sa basa sin las datas da l'onn 2012, constatescha ch'il chantun Turitg è l'unic chantun cun ina planisaziun cumplessiva dals ospitals e ch'il chantun Turitg cumpra sias prestaziuns tenor criteris objectivs a maun d'ina procedura da submissiun publica. A partir dal 1. da schaner 2014 vegn er il chantun Grischun ad avair ina planisaziun dals ospitals sco quella dal chantun Turitg.
Il studi punctuescha ch'ils resultats sajan da considerar sco inventarisaziun provisorica, cunquai che blers projects chantunals per la regulaziun dals ospitals na sajan actualmain betg anc realisads dal tuttafatg. Concretamain è quai il cas en il chantun Grischun. Sche las regulaziuns chantunalas dals ospitals vegnissan puspè cumparegliadas en in pèr onns, è il departament da giustia, segirezza e sanadad perquai persvadì ch'il chantun Grischun figurass anc adina sin ils emprims rangs. En quest senn duai la via tschernida vegnir cuntinuada en moda consequenta. 
 

Illustraziun:
Observaziun dals princips da concurrenza tar las regulaziuns chantunalas dals ospitals, 2012
Funtauna: Polynomics 
 

Remartga:
Link al studi "Die Spitalversorgung im Spannungsfeld der kantonalen Spitalpolitik", Polynomics, 2013 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
 
 
Gremi: departament da giustia, segirezza e sanadad
Funtauna: rg departament da giustia, segirezza e sanadad