La fusiun da las vischnancas da Castrisch, Duin, Glion, Ladir, Luven, Pigniu, Pitasch, Riein, Rueun, Ruschein, Schnaus, Sevgein e Siat a la nova vischnanca dad Ilanz/Glion vegn sustegnida unanimamain da la cumissiun predeliberanta dal cussegl grond. 

La regenza dal chantun Grischun dumonda il cussegl grond en sia missiva dals 18 da zercladur 2013 d'approvar la fusiun da las vischnancas da Castrisch, Duin, Glion, Ladir, Luven, Pigniu, Pitasch, Riein, Rueun, Ruschein, Schnaus, Sevgein e Siat a la nova vischnanca dad Ilanz/Glion. La fusiun duai vegnir realisada per il 1. da schaner 2014. Sut il presidi dal deputà Martin Wieland ha la cumissiun predeliberanta dal cussegl grond predeliberà questa fatschenta per mauns dal cussegl grond che vegn a la tractar en la sessiun d'october 2013. A la sesida èn sa participads er la cussegliera guvernativa Barbara Janom Steiner sco er las represchentanzas da las suprastanzas da las vischnancas pertutgadas.

Las votantas ed ils votants da las vischnancas che sa chattan en il perimeter da fusiun han approvà ils 16 da november 2012 la fusiun da lur vischnancas a la nova vischnanca dad Ilanz/Glion. Sco usità han represchentantas e represchentants da las vischnancas e dal chantun infurmà la cumissiun predeliberanta dal cussegl grond al lieu davart il project da fusiun. Alura ha la cumissiun decidì unanimamain d'entrar en la fatschenta e da proponer al cussegl grond d'approvar questa fusiun impurtanta da 13 vischnancas e da metter en vigur il conclus per il 1. da schaner 2014. Cun la nova vischnanca dad Ilanz/Glion vegn creada la vischnanca la sisavel gronda dal Grischun cun ca. 4600 abitantas ed abitants. En ils egls da la cumissiun correspunda la fusiun en moda ideala a la refurma currenta da las structuras territorialas dal Grischun e rinforza il center economic en Surselva. La nova vischnanca vegn ad appartegnair al circul da la Foppa. Perquai perda il circul da la Lumnezia ina vischnanca (Duin) ed il circul da Rueun trais (Pigniu, Rueun e Siat).

Cun questa fusiun tracta il cussegl grond la proxima sessiun d'october però l'unica fusiun da vischnancas da l'onn 2013. Malgrà quai vegnan las actualmain 158 vischnancas a vegnir reducidas per il 1. da schaner 2014 per 12 a 146 vischnancas, sch'il cussegl grond accepta la dumonda da la cumissiun predeliberanta ed approvescha da sia vart la fusiun a la vischnanca dad Ilanz/Glion. 
 

Infurmaziuns:
president da la cumissiun Martin Wieland, tel. 079 799 61 15


Gremi: cumissiun predeliberanta per la fusiun a la vischnanca dad Ilanz/Glion
Funtauna: rg cumissiun predeliberanta per la fusiun a la vischnanca dad Ilanz/Glion