La regenza grischuna è s'occupada tranter auter da fatschentas federalas. En connex cun la restructuraziun dal sectur d'asil renviescha ella al fatg ch'i ston vegnir prendidas en mira ultra da proceduras pli curtas er meglieraziuns en la pratica d'exequir la spedida. 

Fatgs d'asil: Proceduras acceleradas na bastan betg sulettas
La regenza beneventa la restructuraziun dal sectur d'asil che ha l'intenziun d'accelerar las proceduras d'asil en general. Ella sustegna en quest reguard il sboz davart la midada da la lescha d'asil ch'è vegnì preschentà da la confederaziun. Davart singulas disposiziuns s'exprima la regenza en la consultaziun dentant cun resalvas. A ses avis è la ristga fitg gronda ch'il dretg proponì da survegnir ina cussegliaziun giuridica respectivamain ina represchentanza legala gratuita n'augmentass betg mo l'attractivitad nungiavischada da la Svizra sco destinaziun per requirentas e requirents d'asil, mabain chaschunass er in'ulteriura normaziun da las proceduras d'asil. Perquai propona la regenza da stritgar il dretg da survegnir ina represchentanza legala gratuita.
Da princip ston vegnir realisadas acceleraziuns da las proceduras er en il sectur da l'execuziun da spedidas. Uschia ston vegnir fixads – sin il stgalim da la lescha – clers motivs d'arrest, ils quals permettan als chantuns, che vegnan incumbensads d'exequir spedidas, d'ordinar mesiras repressivas dal dretg da persunas estras suenter la publicaziun da la decisiun da spedida da l'emprima instanza. Proceduras pli sveltas na garanteschan anc betg che las spedidas vegnian exequidas meglier. Anzi vegn la part da las requirentas e dals requirents d'asil ch'è vegnida refusada cun vigur legala e che n'ha nagina perspectiva da dimora en Svizra a s'augmentar fermamain. Uschia crescha la ristga ch'ils custs per l'agid d'urgenza s'augmentan considerablamain. Pertutgads da quai vegnan ad esser cunzunt ils chantuns che n'han nagins centers federals sin lur territori. Perquai duai la confederaziun pajar als chantuns er en l'avegnir ina pauschala d'agid d'urgenza che cuvra ils custs. 

La regenza na vul nagina ulteriura reducziun da l'armada en il Grischun
La regenza grischuna prenda posiziun davart la fatschenta federala per midar la basa giuridica da sviluppar vinavant l'armada. La regenza beneventa il project federal da sviluppar vinavant l'armada, da priorisar sias incumbensas tenor las resursas che la stattan a disposiziun e d'adattar correspundentamain la basa legala. L'armada sa e duai distgargiar las autoritads civilas cun ina vasta paletta d'acziuns da sustegn per dumagnar catastrofas e situaziuns d'urgenza, per ademplir autras incumbensas d'impurtanza naziunala sco er per sa defender cunter privels gravants da la segirezza interna.
Ils ultims 20 onns èn vegnidas reducidas en il chantun Grischun var 140 plazzas en il sectur da l'armada. Ultra da quai è il chantun Grischun stà pertutgà surproporziunalmain da las mesiras da reducziun dal concept da staziunament 2005. Perquai spetga la regenza da la confederaziun ch'i na vegnian reducidas pli naginas ulteriuras plazzas da lavur, plazzas d'armas, infrastructura e commandos en il chantun Grischun. Er da l'annullaziun da la brigada d'infantaria da muntogna 12 cun il commando respectiv staziunà en la caserna a Cuira duai vegnir desistì. Cas cuntrari van a perder ulteriuras plazzas da lavur en la regiun da Cuira e pia er la buna veglia envers l'armada.
Il resultat da la votaziun davart l'iniziativa federala dal pievel "Gea a l'aboliziun dal servetsch militar obligatoric" dals 22 da settember 2013 dal chantun Grischun – 77,1 pertschient cunter l'iniziativa – mussa ch'il chantun Grischun sustegna l'armada. Da questa tenuta positiva stoi vegnir tegnì quint tar la realisaziun dal concept da staziunament per sviluppar vinavant l'armada, renunziond a la reducziun da plazzas da lavur, da plazzas d'armas, d'infrastructura e da commandos. 
 
Nagins projects da votaziun chantunals ils 24 da november 2013
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 24 da november 2013:
- iniziativa federala dal pievel dals 21 da mars 2011 "1:12 – Per salaris gists"
- iniziativa federala dal pievel dals 12 da fanadur 2011 "Iniziativa a favur da las famiglias: deducziuns da taglia er per geniturs che guardan sezs da lur uffants"; e
- midada dals 22 da mars 2013 da la lescha federala davart la taxa per l'utilisaziun da las vias naziunalas (lescha davart la taxa da las vias naziunalas).
Ils 24 da november 2013 na vegni votà davart nagins projects chantunals. 

Las disposiziuns executivas tar la legislaziun da taglia vegnan adattadas
La regenza ha concludì ina revisiun parziala da las disposiziuns executivas tar la legislaziun da taglia. Cun la revisiun vegni resguardà tranter auter che la taglia a la funtauna vegn incassada a partir dal 1. da schaner 2014 da nov da las vischnancas empè dal chantun. Cun questa midada dal sistem sa sposta la repartiziun da la lavur tranter las vischnancas ed il chantun. La nova repartiziun da las lavurs chaschuna er ina midada tar las indemnisaziuns tranter il chantun e las vischnancas. L'import vegn fixà da la regenza. 

Nova disposiziun davart la surannaziun da la taxaziun absoluta per il 1. da december 2013
La revisiun parziala da la lescha da taglia ch'il cussegl grond aveva concludì ils 11 da zercladur 2013 vegn messa en vigur per il 1. da december 2013. Las disposiziuns da questa revisiun parziala pertutgan la surannaziun da la taxaziun absoluta. Il termin absolut actual da 10 onns è memia curt. Per evitar perditas da taglia e per cuntanscher ina concordanza cun la regulaziun federala vegn fixà il termin a 15 onns. Cun l'entrada en vigur per il 1. da december 2013 poi vegnir evità che pretensiuns da l'onn fiscal 2003 suranneschian. Ulteriuras revisiuns parzialas da la lescha chantunala da taglia dals 19 d'october 2010 (taglia a la funtauna) e dals 31 d'avust 2012 (gudogns da lottaria) vegnan mess en vigur per il 1. da schaner 2014. 

La revisiun totala da la lescha davart la cassa da pensiun dal Grischun è en vigur
La revisiun totala da la lescha davart la cassa da pensiun dal Grischun dals 23 d'avrigl 2013 vegn messa en vigur per il 1. da schaner 2014. La revisiun totala è daventada necessaria pervia da prescripziuns liantas dal dretg federal surordinà. 

 
Da vischnancas e da regiuns

• Bregaglia: Il project "sistem da preavertiment Bondo" da la vischnanca da Bregaglia e da l'uffizi chantunal da construcziun bassa vegn approvà. Cun in indriz da surveglianza duain esser disponiblas en l'avegnir a temp infurmaziuns davart bovas. En la chanal dal flum Bondasca vegn installà in indriz per constatar bovas (radar, cordas da trair, indrizs da mesiraziun). Ultra da quai vegnan endrizzadas amplas per lung da la via chantunala e communala. La regulaziun da quest indriz ha lieu en ina centrala da datas. Ils custs totals per l'installaziun e per la gestiun dals indrizs importan 694 800 francs.
• Schiers: La revisiun parziala da la planisaziun locala, concludida da la vischnanca da Schiers il 24 da matg 2013, vegn approvada. La revisiun cuntegna ina nova zona da mastergn e d'abitar, en la quala èn admessas ultra d'interpresas da servetsch e da producziun er edifizis d'abitar en ina dimensiun subordinada. 

 

Gremi: regenza
Funtauna: rg chanzlia chantunala dal Grischun