• Il resultat operativ mussa in surpli d'expensas da 58 milliuns. Sch'ins deducescha las amortisaziuns ch'èn tut en tut pli autas pervia da las prescripziuns da rendaquint dal MAC2 ed ils projects innovativs che vegnan finanziads separadamain, importa il deficit dal preventiv 50,2 milliuns. La directiva dal cussegl grond areguard il deficit maximal dal preventiv da 50 milliuns vegn uschia observada. Cun agid da prescripziuns dal preventiv e dal plan da finanzas restrictivas hai pudì vegnir desistì d'in program da spargn general, e quai malgrà l'augment cuntinuà dals custs en il sectur da las contribuziuns. Quai cuntrari a la gronda part dals chantuns che han stuì elavurar per l'onn 2014 programs da distgargia u da spargn per part fitg dirs.
• Ils custs da persunal creschan moderadamain per 0,5 pertschient. Gia cuntegnì è il svilup dals salaris tenor lescha dad 1,0 pertschient. En il preventiv n'è betg resguardada ina chareschia dals salaris.
• Ils custs da transfers cuntegnan las indemnisaziuns e las contribuziuns a communitads ed a terzas persunas, ils custs per la gulivaziun da finanzas e da grevezzas sco er las amortisaziuns da las contribuziuns d'investiziun. Ils custs da transfers surpassan cun stgars 1,2 milliardas ils custs per l'administraziun centrala (custs da persunal, custs materials ed ulteriurs custs dal manaschi) per bunamain ina mesa milliarda. A communitads ed a terzas persunas duain vegnir pajadas contribuziuns da passa 908 milliuns (+1,2 %).
• Il retgav fiscal vegn inditgà per 3,7 pertschient pli aut che en il preventiv 2013. Da quels resultan 9 milliuns da las entradas fiscalas da las persunas natiralas e 10 milliuns da las entradas fiscalas da las persunas giuridicas. Sa basond sin las entradas fiscalas 2012 sa mussi ch'il preventiv 2013 era calculà memia bass.
• Tar las expensas d'investiziun cuntinuescha la regenza cun sia politica d'investiziun constanta, da la quala l'economia grischuna po sa fidar. L'onn proxim duain vegnir investids 408 milliuns (+11 milliuns) directamain u tras contribuziuns a terzas persunas.
• Per la construcziun e per il mantegniment da las vias chantunalas duain vegnir impundids 193 milliuns. Ultra da l'attribuziun dal retgav net da l'uffizi per il traffic sin via da stgars 80 milliuns e da la contribuziun or da meds publics generals da 20 milliuns surpiglia la confederaziun ina gronda part da las expensas en il sectur da las vias.

Plan da finanzas 2015-2017
Il plan da finanzas repassà 2015-2017 mussa en il quint economic deficits tranter 73 e 97 milliuns. Las prescripziuns dal cussegl grond vegnan pia surpassadas en tut ils onns da planisaziun. Il basegn d'agir exista vinavant, cunquai che la tendenza che las expensas creschan en ina situaziun da retgav malsegira n'è betg sa midada da princip. La refurma currenta da la gulivaziun da finanzas grischuna e las grevezzas supplementaras per il chantun vegnan resguardadas en moda pauschala en il plan da finanzas. In factur impurtant d'influenza, però er da malsegirezza per las finanzas publicas dal Grischun restan ils svilups sin plaun federal e lur consequenzas per ils moviments da finanzas tranter la confederaziun ed ils chantuns. Reducir la dependenza da quests indicaturs che na sa laschan strusch influenzar è tranter auter ina premissa per ina situaziun finanziala sauna ed equilibrada dal chantun.


Il cussegl grond vegn a tractar il preventiv 2014 en la sessiun da december 2013.


Ulteriuras infurmaziuns davart il preventiv 2014 dattan:
 
cussegliera guvernativa Barbara Janom Steiner
scheffa dal departament da finanzas e vischnancas
barbara.janom@dfg.gr.ch, 081 257 32 01

Andrea Seifert
manader da l'administraziun da finanzas
andrea.seifert@five.gr.ch, 081 257 33 01