L'exposiziun speziala en il museum da la natira dal Grischun cun il num "Mustaila ed ermelin – pitschens animals, gronds chatschaders" sa deditgescha als dus represchentants indigens ils pli pitschens dals animals da rapina. Ina impressiun da l'exposiziun dat in nov video da la chanzlia chantunala dal Grischun sut www.gr.ch.

La mustaila e l'ermelin èn pitschens animals da rapina agils e senza paus. Pervia da lur vita clandestina pon ins observar mo darar questas duas spezias. L'exposiziun speziala concepida dal museum da l'istorgia natirala Berna e cumplettada dal museum da la natira dal Grischun, che porta il num "Mustaila ed ermelin – pitschens animals, gronds chatschaders", dat però ina invista fundada en la vita clandestina da quests chatschaders agils.
Ina da las caracteristicas las pli surprendentas e remartgablas da las mustailas è segiramain ch'ellas midan la colur da lur pail. L'enviern èn ellas alvas, la stad brinas. Uschia èn ils animals camuflads en tuttas duas stagiuns.
La mustaila e l'ermelin mangian primarmain mieurs, cunzunt mieurs-sfuignas, che na fan (er) betg plaschair als purs. Cun lur corp lung e satigl pon mustailas suandar lur preda fin en las entgarnas ed en las taunas da quella. Ellas passentan pia ina gronda part dal di sut la terra – betg da smirvegliar ch'ins las vesa mo darar. Mintga di ston ellas dentant mangiar pavel che paisa in terz dal pais da lur corp. Quai vul dir: ir a chatscha senza fin.
La mustaila e l'ermelin vivan en cuntradas cun blers mantuns da roma e da crappa, cun mirs sitgs, cun saivs vivas u a l'ur da guauds. Ellas reageschan en moda sensibla, sche questas structuras svaneschan. Perquai èsi impurtant da mantegnair e da promover quellas. L'exposiziun speziala mussa – a maun d'exempels realistics da mantuns da roma e da plunas laina – tge aspects che pitschnas structuras abitadas da mustailas han. Ultra da quai animescha ella da crear talas.
Accumpagnada vegn la nova exposiziun speziala d'in program attractiv cun visitas guidadas publicas e cun referats.

L'exposiziun dura dals 23 d'october 2013 fin ils 26 da schaner 2014.
Uras d'avertura: Mardi fin dumengia da las 10.00 fin las 17.00, glindesdi serrà. 
 
Remartga:
Il video davart l'exposiziun stat a disposiziun sut www.gr.ch. 
 

Infurmaziuns:
Ueli Rehsteiner, directur dal museum da la natira dal Grischun, Tel. 081 257 28 43
Flurin Camenisch, pedagog da museum, Tel. 081 257 28 45


Gremi: museum da la natira
Funtauna: rg museum da la natira