La regenza grischuna ha approvà il project da concessiun "Conduct da transmissiun Lumnezia" da las Ovras electricas Zervreila SA.

La regenza ha approvà cun tschertas cundiziuns las concessiuns che las vischnancas pertutgadas avevan dà a las Ovras electricas Zervreila SA per utilisar l'aua da la Lumnezia sura. En tschintg lieus da la Lumnezia sura duai l'aua dal Glogn vegnir tschiffada e manada tras galarias sutterranas en il lai d'accumulaziun existent a Zervreila. Cun l'aua tschiffada vegnan las Ovras electricas Zervreila SA a pudair producir en lur stabiliments existents 80 uras da gigawatt electricitad supplementara per onn. Avant l'approvaziun da la concessiun èn vegnids fatgs scleriments voluminus. Sin basa dals giudicaments e da las expertisas da las autoritads spezialisadas da la confederaziun e dal chantun è la regenza vegnida a la conclusiun ch'il project observia las disposiziuns legalas e che las consequenzas per la natira e la cuntrada sajan acceptablas. Il project da concessiun "Conduct da transmissiun Lumnezia" è ina contribuziun essenziala a l'extensiun da l'utilisaziun da la forza idraulica e correspunda uschia tant a la strategia d'energia 2050 da la confederaziun sco er a la politica d'energia dal chantun Grischun. 
 

Infurmaziuns:
Cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail mario.cavigelli@bvfd.gr.ch  


Gremi: regenza
Funtauna: rg chanzlia chantunala dal Grischun