La regenza ha dà en consultaziun ina revisiun parziala da la lescha introductiva tar las leschas federalas davart l'assicuranza da vegls e survivents e davart l'assicuranza d'invaliditad. La finamira è quella da realisar la public corporate governance en l'institut d'assicuranza sociala dal chantun Grischun.

L'institut d'assicuranza sociala dal chantun Grischun è in institut autonom da dretg public cun atgna persunalitad giuridica e cun sedia a Cuira. El coordinescha las lavurs da la cassa da cumpensaziun da la AVS sco er dal post chantunal da la AI. Ultra da quai è el responsabel per incassar la contribuziun en il sectur da l'assicuranza cunter la dischoccupaziun. Plinavant ademplescha l'institut d'assicuranza sociala las suandantas incumbensas: calculaziun e pajament da las prestaziuns supplementaras tar la AVS e tar la AI, dals supplements per uffants e reducziuns individualas da las premias da l'assicuranza da malsauns.

En la revisiun da la lescha sa tracti d'adattar l'organisaziun da l'institut d'assicuranza sociala dal chantun Grischun als princips da la public corporate governance. La noziun "public corporate governance" descriva ils princips per organisar e per regular ils organs administrativs excorporads, per che tals furneschian prestaziuns effizientas. Dal rapport davart la realisaziun da la public corporate governance en il chantun Grischun ha il cussegl grond prendì enconuschientscha durant la sessiun da december 2010.

La cumparegliaziun dals princips da la public corporate governance e da l'organisaziun actuala da l'institut d'assicuranza sociala mussa ch'ils princips da la public corporate governance na vegnan betg resguardads en puncts essenzials. Quests puncts pertutgan tranter auter l'autoritad da surveglianza, la constituziun da la cumissiun administrativa, la limitaziun da las periodas d'uffizi, las pussaivladads da revocar commembras e commembers da la cumissiun administrativa, l'instanza d'engaschament da la direcziun e l'indemnisaziun da las commembras e dals commembers da la cumissiun administrativa. 
 

Remartga:
La consultaziun dura fin ils 28 da favrer 2014. Ils documents pon vegnir consultads sut www.gr.ch / Rumantsch / Consultaziuns currentas. 
 

Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
 

Gremi: regenza
Funtauna: rg chanzlia chantunala dal Grischun