La regenza grischuna ha tractà diversas fatschentas communalas e regiunalas e deliberà las contribuziuns 2013 per la gulivaziun da finanzas intercommunala.

Contribuziuns da gulivaziun e da promoziun per fusiuns da vischnancas da circa 51 milliuns francs
Quest onn vegnan duvrads radund 51,2 milliuns francs per contribuziuns da gulivaziun a vischnancas finanzialmain deblas e per promover fusiuns da vischnancas en il chantun. La regenza ha approvà las contribuziuns da la gulivaziun da finanzas 2013 che vegnan repartidas sco suonda:
- per la gulivaziun da la forza fiscala 2013 vegnan pajads circa 18,5 milliuns francs a totalmain 58 vischnancas;
- per contribuziuns ad ovras publicas vegnan pajads radund 12,8 milliuns francs;
- sut il titel "gulivaziun dal basegn spezial" vegnan pajads tut en tut 2,2 milliuns francs ad 8 vischnancas;
- per contribuziuns da promoziun a fusiuns da vischnancas vegnan pajads totalmain 17,7 milliuns francs. 

Sanaziun da l'En a Martina cun ina nova ovra electrica cuminaivla
Las Ovras electricas d'Engiadina SA (OEE) mainan l'ovra electrica Martina en la vischnanca da Valsot. En spezial l'enviern chaschuna questa ovra differenzas considerablas da la deflussiun e dal livel da l'aua da l'En. Tenor la lescha federala davart la protecziun da las auas ston las OEE prender mesiras per evitar disturbis che vegnan chaschunads tras las midadas da la deflussiun da l'aua. Suenter avair giuditgà questas consequenzas per las auas pertutgadas ha la regenza grischuna obligà las OEE da prender las mesiras correspundentas. La sanaziun da las auas vegn fatga en il rom dal project per in'ovra electrica cuminaivla En. Il project cuntegna ina serra d'accumulaziun a Martina. L'aua che vegn tschiffada là vegn manada tras in tumbin da circa 20 kilometers fin a Prutz en Austria, nua ch'ella vegn turbinada. Las concessiuns, las permissiuns e las approvaziuns ch'èn necessarias en tuts dus stadis èn avant maun dapi l'onn 2012. Tras l'ovra electrica cuminaivla pon las midadas da la deflussiun che l'ovra electrica Martina chaschuna en l'En tranter Martina e Prutz vegnir eliminada l'enviern dal tuttafatg e la stad parzialmain. 

L'iniziativa davart la taglia da baselgia vegn suttamessa a la votaziun ils 9 da favrer 2014
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 9 da favrer 2014:
- conclus federal davart la finanziaziun e l'amplificaziun da l'infrastructura da viafier (cuntraproposta directa a l'iniziativa dal pievel "Per il traffic public");
- iniziativa dal pievel "La finanziaziun da l'abort è chaussa privata – Distgargia da l'assicuranza da malsauns cun stritgar or da l'assicuranza da basa obligatorica ils custs da l'interrupziun da la gravidanza"; e
- iniziativa dal pievel "Cunter l'immigraziun da massa".
Tenor il conclus da la regenza vegni votà dumengia, ils 9 da favrer 2014, davart il suandant project chantunal:
- iniziativa dal pievel "Main taglia per il mastergn" (iniziativa davart la taglia da baselgia). 
 

Da vischnancas e da regiuns 

• Bregaglia: Il project per reparar il batschigl da retenziun d'aua gronda Orden vi da la Orlegna, vischnanca da Bregaglia, vegn approvà. I vegn garantida ina contribuziun chantunala da maximalmain 104 000 francs. Il batschigl da retenziun d'aua gronda Orden protegia l'entira val Bregaglia cunter inundaziuns. Il project cuntegna l'eliminaziun da donns vi dal batschigl da calmar l'aua ch'è ina part accessorica dal stabiliment.
• Mut: La revisiun parziala da la constituziun communala da la vischnanca da Mut dals 27 da settember 2013 vegn approvada.
• Tarasp: La revisiun parziala da la constituziun communala da la vischnanca da Tarasp dals 29 da fanadur 2013 vegn approvada.

Projects da vias
La regenza ha approvà il project d'exposiziun per la correcziun da la via da Serneus, il traject tranter Walki e Serneus, kilometers 0,83 fin 1,01. Il project cuntegna la construcziun nova d'ina punt sur la Landquart, la quala era vegnida destruida da l'aua gronda l'avust 2005. En il nov sectur da colliaziun vegn la via da Serneus adattada a las relaziuns localas.

Ultra da quai ha la regenza approvà 1,9 milliuns francs per lavurs da construcziun sin il suandant traject:
- via naziunala Partenz: installaziuns electricas, sviament da Küblis 


Gremi: regenza
Funtauna: rg chanzlia chantunala dal Grischun