Ils 5 da december 2013 ha il cussegl grond acceptà la refurma da la gulivaziun da finanzas grischuna (refurma da la GF) cun 97 cunter 4 vuschs e duas abstenziuns. Il termin per il referendum facultativ scada ils 19 da mars 2014. Sch'i na vegn betg fatg diever dal referendum, duai la refurma vegnir introducida il 1. da schaner 2015. Il basegn da refurma è grond ed urgent. 
 
Il cussegl grond ha tractà la refurma da la GF durant trais dis en la sessiun da december. El ha rinforzà l'engaschament chantunal sin ils champs da la gulivaziun da las grevezzas socialas e da la scola populara per ulteriurs 6 milliuns francs. Las vischnancas grischunas vegnan distgargiadas en tut per stgars 22 milliuns francs per onn. La refurma da la GF remplazza la gulivaziun da finanzas vertenta tras in concept che correspunda en general a la gulivaziun da finanzas da la confederaziun. Ella garantescha ina gulivaziun transparenta e dirigibla che resguarda ord vista cumplessiva e correcta las differentas entradas e grevezzas da las vischnancas. Las fitg grondas differenzas augmentantas en la capacitad finanziala ed en la grevezza fiscala da las vischnancas vegnan uschia mitigiadas per l'emprima giada en moda cumplessiva ed effectiva. Quai rinforza las vischnancas e la solidaritad entaifer il chantun. Supplementarmain finanzieschan las vischnancas ed il chantun da nov lur incumbensas correspundentamain a lur responsabladad.

 
Infurmaziuns:
Urs Brasser, secretari da finanzas, Tel. 081 257 32 12, E-Mail: urs.brasser@dfg.gr.ch


Gremi: Departament da finanzas e vischnancas
Funtauna: rg Departament da finanzas e vischnancas