La regenza grischuna ha approvà in concept per realisar in center naziunal da cumpetenza per la tratga da muvel manidel en il bain puril Waldhaus a Cuira. Plinavant ha la regenza approvà differentas contribuziuns. 

Center naziunal da cumpetenza per la tratga da muvel manidel
Or dal bain puril Waldhaus a Cuira vegn fatg in center naziunal da cumpetenza per la tratga da muvel manidel. La regenza ha approvà in concept da gestiun per ch'il center da furmaziun e cussegliaziun agricula Plantahof possia installar il center da cumpetenza. L'installaziun vegn fatga resguardond ils basegns dals servetschs psichiatrics dal Grischun (SPGR) per crear ina purschida da terapia cun animals per umans cun ina malsogna psichica da la clinica Waldhaus vischina. Il concept da gestiun mussa, co ch'il basegn da spazi dal center da cumpetenza per la tratga da muvel manidel e dal SPGR vi dal bain puril po vegnir realisà.
La direcziun dal bain puril Waldhaus mida per il 1. da schaner 2014 dal SPGR al Plantahof. L'effectiv da persunal dal bain puril vegn surpiglià dal Plantahof. Il center naziunal da cumpetenza per la tratga da muvel manidel duai sa sviluppar sco nova pitga dal Plantahof. Il Plantahof vul cuntanscher cun quest project ina professiunalisaziun da la tratga da muvel manidel ch'è economicamain interessanta, ed el vuless cuntanscher en Svizra ina rolla da piunier en quest sectur. Resalvada resta l'approvaziun dal credit posteriur tras la cumissiun da gestiun dal cussegl grond.
L'uffizi da construcziun auta vegn incumbensà cun la planisaziun da las adattaziuns architectonicas necessarias dal bain puril Waldhaus. Las stallas avant maun vegnan transfurmadas en stallas per muvel manidel, uschia ch'ellas tegnan quint dals basegns dals animals. Sco effectiv d'animals èn previs 60 chauras da latg, 60 nursas da latg, 40 nursas-mamma e lur ansiels ed agnels. Muvel da latg na vegni betg pli a dar sin il bain puril Waldhaus. Las vatgas vegnan vendidas. 

Charta a la regenza da l'Argovia davart la purschida da talian sin il stgalim superiur
La regenza grischuna s'engascha per la promoziun dal talian sco lingua naziunala er ordaifer il Grischun. Sco che la regenza grischuna scriva en ina brev a la regenza da l'Argovia, ha ella prendì enconuschientscha cun grond displaschair dal fatg ch'il chantun Argovia vul reducir la purschida en talian sin il stgalim superiur pervia da mesiras da spargn. L'avust 2013 ha la regenza da l'Argovia deliberà in pachet da mesiras en il rom d'ina analisa da prestaziun che duai distgargiar las finanzas chantunalas. Tranter auter duai vegnir purschì il talian sco rom d'elecziun mo pli en la 4. classa dal stgalim superiur. Fin ussa ha il talian pudì vegnir tschernì sco rom d'elecziun en las 3. e 4. classas da tut ils tips da scola dal stgalim superiur argovian. La regenza grischuna sa drizza a la regenza da l'Argovia cun la supplitga da reponderar la reducziun da l'instrucziun da talian en la scola populara. Ina reducziun u ina sistida da l'instrucziun da talian na s'accorda tenor l'avis da la regenza betg cun las finamiras da la lescha federala davart las linguas naziunalas e la chapientscha tranter las cuminanzas linguisticas (lescha da linguas). 

L'iniziativa da linguas estras ha rimnà 3709 suttascripziuns valaivlas
L'iniziativa dal pievel "Mo ina lingua estra en la scola primara (iniziativa da linguas estras)" ch'è vegnida inoltrada ils 27 da november 2013 a la chanzlia chantunala è reussida cun 3709 suttascripziuns valaivlas. L'iniziativa legislativa è vegnida redigida en furma d'ina proposta generala. Resguardond ils termins legals vegn l'iniziativa surdada al departament d'educaziun, cultura e protecziun da l'ambient per l'ulteriura elavuraziun en il rom dals conclus da princip da la regenza. 

Augmentà las valurs minimalas da la submissiun
La regenza ha adattà las valurs minimalas da la lescha chantunala da submissiun per il 1. da schaner 2014. Ademplind ina incumbensa dal cussegl grond vegnan augmentadas la valurs minimalas en il sectur betg cumpiglià da contracts internaziunals a las prescripziuns maximalas da la cunvegna interchantunala davart las acquisiziuns publicas. Las novas valurs minimalas vegnan publitgadas en il fegl uffizial dal chantun Grischun. 

Chareschia negativa, salaris fundamentals senza midadas
Ils salaris fundamentals da las collavuraturas e dals collavuraturs da l'administraziun chantunala e las tariffas da la salarisaziun minimala da las persunas d'instrucziun da las scolas popularas restan ils medems l'onn 2014. La regenza ha concludì da betg cumpensar la chareschia negativa per il 1. da schaner 2014.
A la fin da november 2013 importava l'index naziunal dals pretschs da consum 103,3 puncts. La differenza tar il stadi da l'index da la fin da november 2010 cumpensà da 104,2 puncts importa -0,9 pertschient. Fin ad in stadi da l'index da 104,2 puncts vala la chareschia sco cumpensada. 
 

Da vischnancas e da regiuns 

• San Murezzan: A la vischnanca da San Murezzan vegn garantida ina contribuziun chantunala dad 1,5 milliuns francs per construir l'implant da sigliera San Murezzan, e quai en il rom dal concept per implants da sport d'impurtanza naziunala (CISIN). Vitiers vegn ina contribuziun federala da CISIN dad 1,9 milliuns francs. I vegn premess ch'ils purtaders dal nov implant da sigliera s'engaschian d'organisar concurrenzas internaziunalas. Las votantas ed ils votants da San Murezzan avevan approvà ils 24 da november 2013 in credit brut dad 11,5 milliuns francs per construir quest implant.
• Favugn: La revisiun parziala dal plan general da furmaziun 1:1000 Chrüzli che la vischnanca da Favugn ha concludì ils 22 da settember 2013 vegn approvada. Cun la nova planisaziun d'utilisaziun vegn meglierada l'avertura dal territori da construcziun al sid da la vischnanca cun la via d'avertura "Under Chrüzli".
• Castaneda: Il project "Rempar Nandro" che l'uffizi da guaud e privels da la natira ha inoltrà per incumbensa da la vischnanca da Castaneda vegn approvà. I vegn garantida ina contribuziun da maximalmain 342 000 francs. Cun il project vegn garantida la protecziun dal territori d'abitadi da Castaneda e da la via tranter Nandro e Castaneda cunter crudadas da grippa. I vegn construì in rempar d'ina autezza da 4 m e d'ina lunghezza da var 130 m.
• Tavau: La revisiun parziala da la lescha da taglia da la vischnanca da Tavau dals 22 da settember 2013 vegn approvada. Cun la revisiun da la lescha vegn introducida in taglia sin immobiglias.
• Andeer, Castaneda, Lantsch, Tumein: Las revisiuns parzialas da las leschas da taglia da las vischnancas dad Andeer, da Castaneda, da Lantsch e da Tumein vegnan approvadas. Tar tut las revisiuns vegnan integradas novas disposiziuns davart il subject da la taglia sin la part d'ierta e sin donaziuns.
• Lumnezia: La lescha da taglia dals 21 d'avust 2013 da la plaiv catolica-romana Lumnezia mez – fusiun da las plaivs da Degen, da Vella e da Vignogn per il 1. da schaner 2014 – vegn approvada. 

Contribuziuns chantunalas a differentas instituziuns 

• Societad simpla "Pista olimpica da bob San Murezzan": A la societad simpla "Pista olimpica da bob San Murezzan" vegn garantida en il rom dal concept per implants da sport d'impurtanza naziunala (CISIN) ina contribuziun chantunala da 420 000 francs per engrondir la pista olimpica da bob San Murezzan-Schlarigna. La confederaziun vegn a pajar ina contribuziun da CISIN dad 1 milliun francs. Cun engrondir la pista olimpica da bob vegnan meglieradas las premissas per far trenaments e concurrenzas naziunalas ed internaziunalas en differentas disciplinas da sport da glatsch (bob, scarsolar, skeleton). La vischnanca da Schlarigna ha approvà ils 30 da settember 2013 in credit da 0,543 milliuns francs. La vischnanca da San Murezzan ha deliberà ils 3 da december 2013 in credit dad 1,5 milliuns francs en il rom dal preventiv 2014.
• Club da ballape da Domat: Al club da ballape da Domat (FC Ems) vegn concedida ina contribuziun chantunala en il rom dal concept per implants da sport d'impurtanza chantunala (CISIC) da maximalmain 160 000 francs sco er ina contribuziun dal fond da sport da maximalmain 100 000 francs per engrondir la chasa dal club da ballape sin la plazza da sport Vial a Domat. Il FC Ems ha circa 450 commembras e commembers, da quels var 240 junioras e juniors.
• Differentas federaziuns da sport: Totalmain 44 federaziuns da sport ed organisaziuns che fan part da l'associaziun grischuna da sport vegnan sustegnidas cun ina contribuziun totala dad 1 milliun francs. La regenza ha approvà la repartiziun da la contribuziun pauschala 2013 or dal fond da sport. Las contribuziuns vegnan dadas cun la cundiziun da s'engaschar spezialmain per la promoziun dals giuvenils e per il sport d'uffants e da giuvenils. 

Gremi: regenza
Funtauna: rg chanzlia chantunala dal Grischun