Sin invit da la regenza ha l'ambassadur austriac en Svizra, Jürgen Meindl, visità oz il chantun Grischun. 

L'ambassadur Jürgen Meindl e sia dunna dr. Jutta Meindl-Weiss èn vegnids beneventads oz dal president da la regenza Hansjörg Trachsel e dal chancelier Claudio Riesen en la Chasa grischa a Cuira. L'ambassadur austriac è vegnì accumpagnà da mag. Gudrun Hager, commembra da la chombra da commerzi da l'ambassada austriaca e manadra dal center per l'economia da l'exteriur a Turitg, sco er da dr. Wolfgang Wunderlich, advocat e consul onurari al consulat austriac a Cuira. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
 

Fotografia agiuntada:
L'ambassadur Jürgen Meindl e sia consorta Jutta Meindl-Weiss (amez) vegnan retschavids en la Chasa grischa dal president da la regenza Hansjörg Trachsel (a sanestra) sco er dal chancelier Claudio Riesen.


Gremi: regenza
Funtauna: rg chanzlia chantunala dal Grischun