Sin basa d'ina consultaziun entaifer il chantun ha la regenza grischuna prendì posiziun davart il Plan d'instrucziun 21. Ultra da quai ha la regenza concludì da sustegnair il center da cumpetenza per laina Valposchiavo. Plinavant vegn la revisiun da la lescha davart l'assicuranza da malsauns e la reducziun da las premias messa en vigur per il 1. da schaner 2014. 

Nagins pajaments en daner blut tar la reducziun da las premias e "glista naira" da las debituras e dals debiturs da premias
A partir da l'onn 2014 vegnan las reducziuns da las premias pajadas a las assicuranzas da malsauns e betg pli a las persunas assicuradas. Las assicuranzas da malsauns subtraheschan la summa correspundenta dal quint da premias ed infurmeschan las persunas assicuradas. Questa nova regulaziun dal pajament vegn prescritta da la confederaziun. La regenza ha mess en vigur per il 1. da schaner 2014 ina revisiun parziala correspundenta da la lescha davart l'assicuranza da malsauns e la reducziun da las premias ensemen cun l'ordinaziun appartegnenta ch'è medemamain vegnida revedida.
Introducida vegn er ina "glista naira" da las debituras e dals debiturs da premias en il chantun. L'institut d'assicuranza sociala dal Grischun vegn incumbensà da manar ina glista da las persunas assicuradas che na pajan betg lur premias malgrà ina scussiun. Per questas persunas assicuradas suspendan las assicuranzas la surpigliada dals custs per prestaziuns medicinalas, cun excepziun dals tractaments d'urgenza.
Las disposiziuns correspundentas en la lescha davart l'assicuranza da malsauns e la reducziun da las premias èn vegnidas concludidas dal cussegl grond gia il zercladur 2011. La realisaziun tecnica ha chaschunà in retardament. Medemamain per il 1. schaner 2014 vegn messa en vigur ina midada per la calculaziun dal dretg da survegnir ina reducziun da las premias ch'il cussegl grond ha concludì l'avust 2013. 

Plan d'instrucziun 21: Correcturas èn necessarias
La regenza ha prendì enconuschientscha da la consultaziun ch'è vegnida fatga entaifer il chantun davart il Plan d'instrucziun 21. Il resultat da la consultaziun spezialisada d'organisaziuns che stattan datiers a la scola vegn tramess vinavant a la conferenza dals directurs chantunals da l'educaziun publica dals chantuns germanofons (CDEP-T) sco posiziun dal chantun Grischun tar il Plan d'instrucziun 21. La CDEP-T ha preschentà il zercladur passà in sboz dal Plan d'instrucziun 21. Las reacziuns al sboz duain purtar in meglier consens en la populaziun davart la dumonda, tge che las scolaras ed ils scolars duain emprender en la scola populara. Il Plan d'instrucziun 21 armonisescha las finamiras da la scola populara en 21 chantuns germanofons e plurilings.
Las reacziuns davart il Plan d'instrucziun 21 entaifer il chantun èn vegnidas resumadas en in rapport. Sin basa da quel renda la regenza en spezial attent en la posiziun a la CDEP-T che las cumpetenzas en il Plan d'instrucziun 21 èn tut en tut pretensiuns memia autas per las scolaras ed ils scolars e ch'ellas ston vegnir sbassadas ensemen cun la quantitad da la materia d'instrucziun. Plinavant duain l'orientaziun a la pratica ed il sectur manual survegnir dapli paisa en il Plan d'instrucziun 21.
Evaluadas èn er vegnidas las posiziuns davart il project parzial "Grischun". Cun quest project parzial vegnan sviluppadas parts supplementaras per il rumantsch ed il talian en il Plan d'instrucziun 21. 

Sustegn per il center da cumpetenza per laina Valposchiavo
Il chantun sustegna l'installaziun dal center da cumpetenza per laina Valposchiavo. Cun resalva d'ina finanziaziun totala reglada ha la regenza garantì a l'instituziun ch'è responsabla per il center da cumpetenza per laina, al Centro Tecnologico del Legno (CTL), Brusio, in emprest da la confederaziun en il rom da la nova politica regiunala (NPR) dad 1,5 milliuns francs. Sco prestaziun d'equivalenza a l'emprest da la NPR vegn garantida ina contribuziun chantunala da 434 070 francs. Ultra da quai vegn deliberada ina summa da 150 000 francs sco contribuziun ad in project destinà al svilup da l'economia locala. Resalvada resta la concessiun dals credits necessaris tras il cussegl grond.
Il project sa basa sin ina iniziativa per il svilup da l'economia locala da la regiun Valposchiavo. Sin basa dal sistem svizzer da la furmaziun professiunala duain vegnir purschidas en quest territori transcunfinal furmaziuns supplementaras bilinguas en il sectur dal lain, dals materials da lain e da l'elavuraziun da laina. Igl è previs d'installar a Puschlav in center da furmaziun e d'innovaziun cumplessiv che intermediescha a las collavuraturas ed als collavuraturs d'interpresas pitschnas e mesaunas sco er d'interpresas industrialas, oravant tut da las parts talianas da la Svizra e da la regiun Lumbardia, enconuschientschas da l'entir process d'elavuraziun da laina.
Il center da cumpetenza per laina Valposchiavo vegn installà en differentas fasas. En in'emprima fasa a partir da l'onn 2014/2015 duai il center porscher scolaziuns e furmaziuns supplementaras praticas. Quintà vegni l'emprim onn da gestiun cun var 180 studentas e students. En ina segunda fasa dal project duain vegnir purschids ultra dals studis agens servetschs per interpresas da la branscha d'elavuraziun da laina. Ils emprims onns vegnan stgaffidas en il center fin ad 8 plazzas da lavur a temp cumplain. Ultra da quai datti effects positivs per il martgà da lavur da la regiun.
La direcziun operativa dal center da cumpetenza per laina ha l'uniun purtadra da la scola spezialisada superiura da la Svizra sidorientala (IFSP). Ella è er responsabla per il model d'instrucziun al center. La IFSP vegn ad elavurar ed a manar il sectur da la furmaziun supplementara professiunala e da la furmaziun professiunala superiura. En il rom d'in studi preliminar per il project davart il center da cumpetenza per laina è vegnì lantschà l'onn 2011 a Puschlav in studi da pilot da la IFSP. Quest project vegn sustegnì tant da la regiun Lumbardia sco er da la provinza da Sondrio. 

Project da pilot per la promoziun dal sport da prestaziun
La regenza ha lantschà in project da pilot per sustegnair il sport da prestaziun. Per ina durada da 3 onns – dentant il pli ditg fin al relasch dal concept chantunal per promover il sport – vegn deliberada per il project ina contribuziun totala da maximalmain 414 000 francs or dal fond chantunal da sport. Pudair profitar dal sustegn per il sport da prestaziun duain – en il rom dal project da pilot – la federaziun da skis dal Grischun per il sectur alpin sco er la fundaziun per sport da prestaziun a Tavau per il center naziunal da trenament "Skis alpin ost". Or dal fond chantunal da sport survegnan ellas uschia contribuziuns da la medema autezza sco quai che la confederaziun paja per la promoziun da la generaziun giuvna da Giuventetgna+sport. La cuntinuaziun dals centers da trenament installads po pia vegnir segirada, fin ch'il concept chantunal per promover il sport è en vigur. 

Adattà l'ordinaziun d'energia
Per il 1. da schaner 2014 ha la regenza revedì parzialmain l'ordinaziun d'energia. Ella ha concludì novas disposiziuns en il sectur da las mesiras da promoziun. Uschia èn vegnidas adattadas las cundiziuns da promoziun per pumpas da chalur sin basa da l'aria e da l'aua. Er las premissas da promoziun per corporaziuns da chalur èn vegnidas schluccadas parzialmain. La contribuziun maximala da promoziun per corporaziuns da chalur è vegnida auzada. 

Revedì parzialmain l'ordinaziun tar la lescha per promover la tgira da persunas malsaunas
L'ordinaziun tar la lescha per promover la tgira da persunas malsaunas e l'assistenza da persunas attempadas e da persunas che basegnan tgira (ordinaziun tar la lescha per promover la tgira da persunas malsaunas) vegn midada per il 1. da schaner 2014. La revisiun parziala cuntegna adattaziuns per reducir la lavur administrativa dals furniturs da prestaziuns. Auzads vegnan er ils custs renconuschids da las chasas da persunas attempadas e da tgira sco er dals servetschs da la tgira ed assistenza a chasa. 

Novas disposiziuns da pestga a partir da l'onn 2014
La revisiun parziala da la lescha chantunala da pestga, concludida dal cussegl grond ils 29 d'avust 2013, vegn messa en vigur per il 1. da schaner 2014. En connex cun la revisiun da la lescha ha la regenza gia adattà e concludì pliras ordinaziuns. Questas revisiuns vegnan messas en vigur il medem mument sco la revisiun parziala da la lescha da pestga. 


Gremi: regenza
Funtauna: rg chanzlia chantunala dal Grischun